PROQRAMLAR

Azərbaycanda rəqəmsal inkişafın sürətlənməsi ilə kibertəhlükəsizlik dövlət siyasətinin əsas prioritet istiqamətlərindən birinə çevrilib. Bu sahədə milli potensialın gücləndirilməsi, peşəkar kadr hazırlığının genişləndirilməsi və kibertəhlükəsizlik ekosisteminin formalaşdırılması istiqamətində ardıcıl işlər görülür.

Xeberler.az məlumat verir ki, bu sözləri İnnovasiya və Rəqəmsal İnkişaf Agentliyinin (İRİA) İdarə Heyətinin sədri Fərid Osmanov Azərbaycan Kibertəhlükəsizlik Mərkəzinin (AKM) 7-ci məzun günü çərçivəsində jurnalistlərə açıqlamasında deyib.

F.Osmanov bildirib ki, bu il fevralın 27-də Azərbaycan Prezidenti tərəfindən təsdiq edilmiş 2026–2028-ci illəri əhatə edən "Rəqəmsal inkişafın sürətləndirilməsi üzrə Fəaliyyət Planı"nda kibertəhlükəsizlik əsas icra istiqamətlərindən biri kimi müəyyən olunub: "Fəaliyyət Planı çərçivəsində ölkəmizdə milli kibertəhlükəsizlik ekosisteminin qurulması, bu sahədə fəaliyyətin gücləndirilməsi və insan kapitalının inkişafı xüsusi əhəmiyyət daşıyır. Rəqəmsal transformasiya sürətləndikcə kibertəhlükəsizlik məsələləri də daha da aktuallaşır və dövlət siyasətinin ayrılmaz tərkib hissəsinə çevrilir".

Onun sözlərinə görə, artıq dördüncü ildir fəaliyyət göstərən Azərbaycan Kibertəhlükəsizlik Mərkəzi İsrailin TECHNION Texnologiya İnstitutu ilə əməkdaşlıq çərçivəsində yüksəksəviyyəli mütəxəssislərin hazırlanmasını həyata keçirir: "Bu günədək AKM tərəfindən müdafiə və hücum istiqamətləri üzrə 420-dən çox kibertəhlükəsizlik mütəxəssisi hazırlanaraq əmək bazarına təqdim edilib. Məzunlarımızın 90 faizdən çoxu dövlət və özəl sektorda işlə təmin olunub. Bu göstərici proqramın effektivliyini və əmək bazarının tələblərinə uyğunluğunu bir daha təsdiqləyir".

F.Osmanov qeyd edib ki, AKM yalnız peşəkar kadr hazırlığı ilə kifayətlənmir, eyni zamanda, ölkədə kibermaarifləndirmə istiqamətində də geniş fəaliyyət göstərir. İndiyədək 7 mindən çox vətəndaş kibermaarifləndirmə təlimlərinə cəlb olunub. Bu gün AKM-in 7-ci məzun günü çərçivəsində daha 60 kibertəhlükəsizlik mütəxəssisi məzun olaraq əmək bazarına qoşulur: "Bu buraxılışın fərqləndirici cəhətlərindən biri ondan ibarətdir ki, ən yüksək nəticə göstərən 5 məzun xarici ölkələrdə fəaliyyət göstərən qabaqcıl kibertəhlükəsizlik və rəqəmsal texnologiya şirkətlərində bir ay müddətində ödənişsiz təcrübə proqramında iştirak etmək imkanı qazanıb. Bu təşəbbüs onların beynəlxalq təcrübə əldə etməsinə və peşəkar bacarıqlarını daha da inkişaf etdirməsinə mühüm töhfə verəcək".