TƏHLÜKƏSİZLİK

Hazırda dünyada 3 milyondan çox kibertəhlükəsizlik üzrə mütəxəssisə ehtiyac var. Bu tələbat Azərbaycanda da aktualdır. Hazırda həm dövlət, həm də özəl sektorda kibertəhlükəsizlik üzrə mütəxəssislərə ciddi bir tələbat var. Artıq Azərbaycan Kibertəhlükəsizlik Mərkəzinin 60 mütəxəssisi hazırlanıb və məzun olub. Dövlət və özəl qurumlardan bu məzunlara maraq çoxdur. Məzunlarımızın bir çoxu artıq işlə təmin olunub.

Bu barədə müsahibəsində İnnovasiya və Rəqəmsal İnkişaf Agentliyinin sədrinin müşaviri Şahin Əliyev deyib.

Azərbaycan Kibertəhlükəsizlik Mərkəzində müxtəlif istiqamətlər üzrə kibertəhlükəsizlik mütəxəssisləri yetişdirildiyini qeyd edən Ş.Əliyev vurğulayıb ki, bunlar mövcud infrastruktur təhlükəsizliyin təmin olunması üzrə yetişən mütəxəssislərdi. Beynəlxalq təcrübədə belə mütəxəssislərə “blue team” (mavi komanda) və hücumyönümlü komanda “red team”dir (qırmızı komanda) deyilir. Kibertəhlükəsizlik Mərkəzinin məzunlarının əsas məqsədlərindən biri hazırlanan məhsulların, xidmətlərin kibertəhlükəsizlik baxımından keyfiyyətinin yoxlanılması, onların həqiqətən də hücumlara qarşı dayanıqlı olduğunu təmin etmək və lazım olduqda müxtəlif infrastrukturlara hücumları simulyasiya edərək həmin infrastrukturun belə hallara nə qədər dayanıqlı olduğunu yoxlamaqdan ibarətdir.

“Digər istiqamət isə Kibertəhlükəsizlik Mərkəzində yerli məhsulların istehsalı üzərində işlərin aparılmasıdır. Həm proqramlaşdırma bilikləri olan, həm kibertəhlükəsizlik üzrə kifayət qədər biliklərə sahib olan gənclərin iştirakı ilə Azərbaycanda yerli məhsulların hazırlanması prosesinə başlamışıq. Növbəti üç il ərzində ən azından bir yerli məhsulun hazırlanması, hətta onun xarici bazarlara çıxarılmasını öz qarşımıza hədəf qoymuşuq”, - deyə Ş.Əliyev əlavə edib. (Azərtac)