“INNOLAND” İnkubasiya və Akselerasiya Mərkəzində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin nümayəndələri və Agentliyin “İnnovasiyalar Mərkəzi”nin rəhbərliyi Dünya Bankının nümayəndə heyəti ilə görüş keçirib.
Xeberler.az-ın məlumatına görə, görüşün keçirilməsində əsas məqsəd “INNOLAND” İnkubasiya və Akselerasiya Mərkəzinin fəaliyyətinin təhlili və onun strateji inkişafında Dünya Bankının potensial dəstək mexanizmlərinin müəyyənləşdirilməsi olub.
Görüş zamanı Dünya Bankının nümayəndə heyətinə innovasiya və startap ekosistemi sahəsində həyata keçirilən layihələr və "INNOLAND" İnkubasiya və Akselerasiya Mərkəzində startaplar üçün yaradılmış imkanlar barədə məlumat verilib. Həmçinin Azərbaycanda startap ekosisteminin mövcud vəziyyəti, Mərkəz tərəfindən göstərilən xidmətlər və növbəti beş il üzrə əsas hədəflərə dair müzakirələr aparılıb.
Sonda Dünya Bankının Azərbaycanda startap ekosisteminə töhvə verməsi məqsədilə növbəti addım kimi bütün maraqlı tərəflərlə, o cümlədən universitetlər, startaplar, potensial investorlar və “INNOLAND” İnkubasiya və Akselereasiya Mərkəzinin tərəfdaşları ilə görüşlərin keçirilməsinin vacibliyi vurğulanıb.
