TƏHLİL VƏ RƏYLƏR

  Qlobal Şəbəkənin təhlili ilə məşğul olan Netcraft analitik şirkəti saytların sayı barədə yanvar hesabatını təqdim edib. Şirkət qeyd edir ki, 1994-cü ildən saytların sayı barədə aylıq qeydiyyat aparır və son 15 il ərzində şəbəkədə saytların sayının durmadan artması müşahidə olunur.

  Lakin cari ilin yanvar ayında bu prosesdə dönüş hiss olunub. Belə ki, 1 yanvar tarixinə olan vəziyyətə dair məlumatlara əsasən, Netcraft-ın bazasında 185 497 213 resurs haqqında informasiya mövcuddur. Dekabr ayında isə resursların sayı 1,23 milyon daha çox idi. Bu cür enmənin səbəblərini Netcraft obyektiv, enmə prosesinin özünü isə şəbəkənin xüsusiyyətlərinə “qeyri-uyğun” adlandırır.

  Mütəxəssislərin fikrincə Qlobal Şəbəkədə resursların sayının enməsi əsasən iki səbəbdən irəli gəlir. Birincisi, bu maliyyə böhranıdır ki, belə vəziyyətdə istifadəçilər İnternetə dair xərclərə qənaət etmək məcburiyyətində qalır, reklamsız qalan layihələr dayandırılır. Mütəxəssislər qeyd edirlər ki, şəbəkəyə televiziya və radiodan reklam verənlərin axınını gözləyən internet agentliklərinin, böhranın reklam üçün əlverişli olacağına dair “proqnozları”  özünü doğrultmur. Ən azından, rəqəmlər internetdə fəallığın azalmasından xəbər verir. İkinci səbəbi milad və yeni il bayramları ilə əlaqədar ənənəvi məzuniyyət və tətillərlə əlaqələndirmək olar, Cybersecurity. yazır.

  Cari ay ilə bağlı vəziyyətə dair Netcraft bundan da “qəmgin” proqnozlar təqdim edir, səbəb isə yanvar ayının ənənəvi olaraq biznes baxımından sakit ay hesab olunmasıdır.

xeberler.az/Ellada