RƏQƏMSAL DÜNYA

İpoteka və Kredit Zəmanət Fondu Rəqəmsal İnkişaf və Nəqliyyat Nazirliyinin tabeliyində fəaliyyət göstərən “AzInTelecom” MMC-yə məxsus Yevlax Əlçatanlıq Zonasında (Data Mərkəzi) BaaS (Backup-as-a-Service) xidmətindən faydalanır. Bu xidmət məlumat və bulud infrastrukturunun daimi rezervlənməsi, məlumat itkisi baş verən zaman onun operativ şəkildə bərpasının təmin edilməsi və qurumlar üçün mühüm olan məlumatın qorunub saxlanılmasını asanlaşdırır.

Xeberler.az bildirir ki, xidmət benefisiarlara rezervlənmə üçün daxili resurs tələbatının azaldılması hesabına xərclərin optimallaşdırılması, virtual infrastrukturların Data Mərkəzində avtomatlaşdırılmış şəkildə rezervlənməsi, şifrləmə vasitələrindən istifadə etməklə məlumatların müxtəlif məkanlarda saxlanılması və təhlükəsizliyinin təmin edilməsi kimi üstünlüklər yaradır. Eyni zamanda, istifadəçiyə rezervlənmə prosesini gündəlik, aylıq və ya illik meyarlara əsasən planlaşdırmaq, rezervlənmələrin məlumatların artımı bazasında həyata keçirilməsi hesabına yaddaş və trafik xərclərinə qənaət etmək imkanı verir.

Məlumat üçün bildirək ki, Fond Bakı Əlçatanlıq Zonasında “AzInTelecom” MMC-nin təqdim etdiyi İaaS (İnfrastructure-as-a-Service) Bulud infrastrukturu xidmətindən də faydalanmağa davam edir. Gələcəkdə DRaaS (Disaster Recovery-as-a-Service – Fövqəladə hal zamanı bulud sisteminə miqrasiya olunmuş məlumatların qorunması) xidmətindən faydalanmağı planlaşdırır.

“AZCLOUD” tərəfindən təqdim olunan həllər qurumların konkret tələbatlarına cavab verməyə və ehtiyac yarandıqca infrastruktur əldə etməyə imkan verir. Bundan əlavə, DDoS (Paylanmış xidmətdən imtina hücumları) Mühafizə xidməti ilə infrastrukturun etibarlılığı və təhlükəsizliyi təmin olunur, “Load Balancing” (Yüklənmənin tarazlaşdırılması) xidməti isə qurumların şəbəkədən istifadəsini optimallaşdırır.

Yevlax Əlçatanlıq Zonasının keyfiyyətli infrastruktur və peşəkar mütəxəssislər vasitəsilə dəstəklənməsi müştərilər üçün informasiya texnologiyalarından istifadənin səmərəliliyini daha da artırmağa, maliyyə xərclərinə böyük həcmdə qənaət etməyə imkan yaradacaq.

Qeyd edək ki, “AzInTelecom” MMC Azərbaycan və Cənubi Qafqaz regionunda “TIER III” Beynəlxalq uyğunluq sertifikatına malik ilk qurumdur. Bundan əlavə, “ISO 20000”, “ISO 22301” və “ISO 27001” sertifikatlarının tələblərini ödəyən Bakı və Yevlaxda yerləşən 2 Əlçatanlıq Zonasına (Data Mərkəzinə) sahibdir.

“AzInTelecom” MMC “AZCLOUD” üzrə dövlət orqanları və özəl sektora genişmiqyaslı, eləcə də çoxşaxəli bulud xidmətləri təqdim edir. Bu xidmətlərə “Bulud infrastrukturu”, “Yerləşdirmə”, “AZCLOUD Drive”, “Arxivləşdirmə”, “Rezervlənmə”, “Microsoft” məhsulları, “Oracle” məhsulları və “Virtual İP Telefoniya” daxildir.