AZNET

Özünün informasiya siyasətinin təkmilləşdirilməsi istiqamətində fəaliyyətini davam etdirən Ekonomiks Beynəlxalq İqtisadi Araşdırmalar Birliyi (BİAB) təşkilatın rəsmi internet saytını istifadəyə verib.

İctimai Birlikdən Xəbərlər-ə verilən məlumata görə, biab.az (www.biab.az) adlanan sayt əsasən iqtisadi yönümlü xəbərlərə üstünlük verəcək.

Saytda illər üzrə ölkənin makroiqtisadi göstəricilərindən tutmuş, iqtisadiyyatın əsas sahələri – sənaye, aqrar sektor, tikinti, neft hasilatı, energetika, xarici və daxili ticarət, rabitə, nəqliyyat, turizm, eləcə də investisiya layihələri, büdcə, sosial müdafiə və sosial təminat, bank, elm, təhsil, səhiyyə və digər sahələrə aid statistik rəqəmlər də öz əksini tapıb.

biab.az saytında təşkilatın sədri, iqtisad elmləri doktoru, professor Fikrət Yusifovun müxtəlif KİV orqanlarına verdiyi açıqlama və müsahibələr, eləcə də onun ayrı-ayrı məsələləri əhatə edən şərhləri də oxucuların diqqətinə təqdim olunacaq.

Onlayn rejimdə fəaliyyət göstərəcək və gündəlik iqtisadi xəbərlər yayımlayacaq saytın əsas hədəfi sosial-iqtisadi sahənin əsas informasiya resurslarından birinə çevrilməkdir. Bu məqsədlə qarşıdakı mərhələdə saytın rus və ingilis dilli versiyaları da izləyicilərin ixtiyarına veriləcək. Hazırda texniki məsələlərin həlli ilə bağlı işlər davam etdirilir.

Ekonomiks Beynəlxalq İqtisadi Araşdırmalar Birliyi sosial şəbəkələrdə də effektiv iş qurulması istiqamətində işlər aparır. Hazırda təşkilatın Facebook səhifəsi (https://www.facebook.com/Ekonomiks.BIAB?fref=ts) fəaliyyət göstərir. Yaxın müddətdə isə BİAB-ın Twitter hesabı da aktivləşdiriləcək.

Xeberler.az