TENDER

Bu gün Xeberler.az İKT portalının 10 yaşı tamam olur.

Xeberler.az ölkədə texnologiyalar sahəsində milli kontent formalaşdırmaq, oxucuları Azərbaycanda və dünyada İKT sahəsində baş verən yeniliklərlə tanış etmək məqsədilə yaradılıb.

Xatırladaq ki, İKT xəbər portalı 2006-cı ildə çap formada fəaliyyətə başlayan “Online” Jurnalının elektron versiyası olaraq 22 iyun 2008-ci ildən fəaliyyətdədir.

Sayt 2014-cü ilin oktyabrından yeni komanda formalaşdırıb, portalda struktur və dizayn dəyişikliyi edilib.

Portalın İOS və Android üçün mobil əlavələri və izləyicilərinin sayı 100 minə yaxınlaşan sosial media resursları (Facebook, Twitter, Instagram, YouTube) da mövcuddur.

Oxucular mobil tətbiqləri yükləyərək, texnoloji yeniliklərdən daha tez xəbər tuta bilər. Oxucuların rəyinə əsaslanaraq qeyd edə bilərik ki, resurs ölkənin İKT ictimaiyyətinin əsas informasiya mənbəyinə çevrilib.

Xeberler.az-da yalnız gündəlik İKT xəbərlərini yox, müxtəlif maraqlı müsahibələri, İKT tədbirləri və konfransları haqqında məlumatları, keçirilən tədbirlərin fotoreportajlarını əldə etmək olar.

Sayt ölkənin İKT bazarının spesifik sahələrinin işıqlandırılmasında mühüm yer tutur. Belə ki, portal müxtəlif İT qurumlarla əməkdaşlıq edir, İT tədbirlərə informasiya dəstəyi göstərir.

Sayt ölkədə startap ekosisteminin inkişafına, blokçeyn texnologiyaların tətbiqi və tənzimlənməsinə informasiya dəstəyi verir, cəmiyyətə bu trendlər barədə mütəmadi məlumatlar təqdim edir. Ölkədə İKT üzrə çoxsaylı rubrikalar və layihələr, analitik yazılar, araşdırmalar və müsahibələr, İKT üzrə maraqlı reportajlar, milli startapların inkişafı, İKT-nin müxtəlif sahələri ilə bağlı sorğular, Elektron Hökumət quruculuğu, İKT sahəsində qanunvericilik, yeni texnologiyalar barədə maarifləndirici yazılar və s. kimi məsələlər Xeberler.az portalının əsas fəaliyyət istiqamətləridir.

Hazırda Xeberler.az –da daha bir dizayn və struktur dəyişikliyi üzərində işlər aparılır. Bu Xəbərlər.az -ın sayca 4-cü yenilənməsidir. Xeberler.az 4.0 versiyasinin yaxin zamanlarda təqdim edilməsi nəzərdə tutulub.

Qeyd edək ki, Xeberler.az İKT sahəsindən yazan bir çox jurnalistlər üçün məktəb olub. Əvvəllər burada çalışan jurnalistlər və redaktolar hazırda İKT ilə əlaqəli müxtəlif sahələrdə fəaliyyət göstərirlər, bir çox müstəqil internet media qurumlarına rəhbərlik edirlər.

Çoxsayli oxucularımızı və komandamızı Xeberler.az-ın ad günü münasibətiylə təbrik edirik, bundan sonra da uğurlu və operativ fəaliyyət arzu edirik!

Xeberler.az