SÜNİ İNTELLEKT VƏ DATA

Süni İntellekt və Verilənlər Elmi üzrə II Avrasiya Forumunun əsas mövzusu süni intellekt texnologiyasıdır. Süni intellekt çevriliş yaradan, dünyanı dəyişdirən texnologiyadır və onun gələcəkdə nələrə qadir olacağını təsəvvür etmək belə çətindir.

Xeberler.az məlumat verir ki, bu sözləri jurnalistlərə müsahibəsində İsrailin Ben-Qurion Negev Universitetinin vitse-prezidenti Dan Blumberq deyib. O qeyd edib ki, bu gün hər kəs süni intellektin təsirini hiss edir, lakin gələcəkdə nələr edəcəyini tam təsəvvür etmək üçün bəşəriyyətin xəyali gücü hələ kifayət deyil. “Texnoloji inkişafa baxmayaraq, heç nə insan təmasını əvəz edə bilməz. Məhz buna görə bu gün hamı eyni məkanda bir araya gəlib, bir-biri ilə fikir mübadiləsi aparır. Bakı Dövlət Universiteti ilə imzalanan memorandumun isə praktiki əməkdaşlığa, birgə dərslərə və tələbə mübadiləsinə töhfə verəcəyinə ümid edirəm”, - deyə israilli qonaq əlavə edib.

O vurğulayıb ki, çoxları süni intellektin iş yerlərini azaldacağından və insan əməyinə ehtiyac qalmayacağından danışır. Lakin əslində, yeni sahələr üçün insanlara daha çox ehtiyac duyulacaq: “Yeni peşələrin yaranacağını, süni intellektin insanları daha məhsuldar və səmərəli edəcəyini düşünürəm. Hesablama gücü artdıqca daha böyük və mürəkkəb vəzifələr meydana çıxacaq, süni intellektlə bağlı yeni iş imkanları yaranacaq”.