E - HÖKUMƏT

bp Azəri-Çıraq-Günəşli, Bakı-Tbilisi-Ceyhan, “Şahdəniz” və “Cənubi Qafqaz Boru Kəməri” layihələrindəki tərəfdaşları - SOCAR, TPAO, LUKOİL, SGC, NİCO, MOL, İNPEX, “ExxonMobil”, İTOCHU, “ONGC Videsh”, “Eni”, MVM və “TotalEnergies” - adından ölkədə qabaqcıl rəqəmsal transformasiya səylərini dəstəkləyən sosial investisiya layihəsini tamamlayıb.

Xeberler.az məlumat verir ki, layihədə məqsəd Azərbaycan Mediasiya Şurasının xidmətlərini təkmilləşdirmək üçün yeni rəqəmsal platformanın yaradılmasıdır.

Bu təşəbbüs ölkə üzrə mediasiya xidmətlərindən istifadə imkanlarının və bu xidmətlərin səmərəliliyinin artırılması səylərinə əhəmiyyətli töhfədir. Yeni platformanın təqdimat mərasimində çıxış edən bp-nin Xəzər regionu üzrə vitse-prezidenti Bəxtiyar Aslanbəyli deyib: “Azərbaycan üçün nisbətən yeni olan bu sahənin inkişafına töhfə verən layihəni dəstəkləməkdən məmnunuq. Mediasiya Şurasının müraciətləri indiyədək əl ilə idarə etməsi tez-tez gecikmələrə və istifadəçilər arasında narazılığa səbəb olurdu. Artan tələbatı və müasirləşmə ehtiyacını nəzərə alaraq, tərəfdaşlarımızla birlikdə, biz mediasiya prosesinin bütün mərhələlərini sadələşdirən və rəqəmsallaşdıran əhatəli onlayn platformanın yaradılmasına dəstək verdik. İnanırıq ki, ictimai xidmətlərə əsl səmərəlilik və innovasiya gətirən bu layihə Azərbaycanın ədliyyə sisteminin rəqəmsal transformasiyasına mühüm töhfədir”.

Yeni istifadəyə verilmiş platformada mediasiya xidmətlərinin ümumi idarəçiliyini əhəmiyyətli dərəcədə yaxşılaşdıran geniş çeşidli rəqəmsal funksiyalar təqdim edilib. Yeni platformanın əsas üstünlükləri ictimai istifadə imkanlarının təkmilləşdirilməsi, vətəndaşlar və hüquqi şəxslərin mediasiya xidmətlərindən daha sürətli və rahat istifadə edə bilməsi, iş səmərəliliyinin artırılmasını təmin etməkdən ibarətdir.

Mərasimdə çıxış edən Azərbaycan Mediasiya Şurasının sədri Nadir Adilov yeni portalın səmərəsindən danışıb. Qeyd olunub ki, Mediasiya Şurası indi daha çox müraciətə baxa və dövlət müəssisələrindən tələb olunan sənədləri real vaxt rejimində əldə edə bilər.

Tədbirdə hüquq elmləri doktoru Etibar Əliyev və başqaları çıxış edərək elektron mediasiya və digər orqanlara vətəndaşların elektron qaydada müraciətlərinə baxılmasından, şəffaflığın təmin olunmasından danışdılar.

Səkkiz ay davam etmiş bu layihənin ümumi dəyəri 126 min 880 manatdır (74 min 635 dollar). Bu məbləğə avadanlıqların alınması və quraşdırılması, İT infrastrukturunun, proqram təminatının hazırlanması, portalın yaradılması və yeni platformanın səmərəli istifadəsinin təmin olunması üçün işçi heyətinə təlim keçilməsi daxildir.

Layihə Azərbaycan Mediasiya Şurası tərəfindən həyata keçirilib.