TEXNOLOGİYA

"Microsoft", "Windows Store" platformasında tətbiq yayımlamaq üçün tələb olunan 19 dollarlıq birdəfəlik ödənişi ləğv edib. Bu addım sayəsində fərdi tərtibatçılar proqramlarını mağazaya tamamilə pulsuz şəkildə yükləyə biləcəklər.

Xeberler.az məlumat verir ki, şirkətin açıqlamasına görə, artıq təxminən 200 ölkədən olan tərtibatçılar şəxsi "Microsoft" hesabı ilə heç bir ödəniş etmədən "Windows Store" üzərindən tətbiq yayımlaya biləcəklər.

Həmçinin qeydiyyat zamanı kredit kartı istifadəsi də məcburi olmayacaq.

"Apple" və "Google" platformalarında tətbiq paylaşmaq üçün müvafiq olaraq illik 99 və birdəfəlik 25 dollar tələb olunduğu üçün, "Microsoft"un bu qərarı sektorda diqqət çəkən strateji addım kimi qiymətləndirilir.

"Microsoft" nümayəndəsi Çetna Das bildirib ki, bu dəyişiklik tərtibatçılar üçün əhəmiyyətli maneələri aradan qaldıraraq, daha əlçatan və əhatəli bir platforma yaradacaq.

Son illərdə "Windows Store"u yeniləyən "Microsoft", aylıq 250 milyondan çox aktiv istifadəçiyə çatdığını və istifadəçi təcrübəsini yaxşılaşdırdığını qeyd edib. Şirkət həmçinin tərtibatçılara "Win32", "UWP", "PWA", ".NET", "MAUI" və "Electron" kimi formatlarda tətbiqlər təqdim etmək, oyun kateqoriyasına daxil olmayan tətbiqlərdə isə öz ödəniş sistemlərindən istifadə etməklə gəlirləri qorumaq imkanı verir.

Bu qərarın, xüsusilə müstəqil tərtibatçılar və yeni başlayanlar üçün maliyyə baryerlərini aradan qaldıraraq, mağazada yayımlanan tətbiqlərin sayını artırması gözlənilir.