TEXNOLOGİYA

Azərbaycan qabaqcıl texnologiyalar, innovasiyalar, rəqəmsallaşma baxımından çox sürətlə inkişaf edir. Əlbəttə, hər bir sənaye sahəsində bu proses eyni sürətlə getmir, biz SAP klasteri olaraq hazırda neft-qaz sənayesində, pərakəndə satışda, nəqliyyatda daha çox təmsil olunuruq. Azərbaycanda telekommunikasiya şirkətləri ilə fəal əməkdaşlıq edirik, lakin yeni əməkdaşlıq etdiyimiz digər sahələrlə də münasibətləri inkişaf etdirmək istərdik.

Bu barədə müsahibəsində Multi-country SAP klasterinin direktoru Aleksandr Meteçko oktyabrın 25-də Bakıda keçirilən “SAP Discovery Day Baku” forumu çərçivəsində bildirib.

Aleksandr Meteçko qeyd edib ki, SAP Azərbaycan iqtisadiyyatı ilə birlikdə çox sürətlə inkişaf edir.

“Biz Azərbaycanda biznesimizin inkişafına fəal şəkildə investisiya yatırırıq. Azərbaycan şirkətlərinə inkişaf məqsədilə həllər təklif edə bilmək üçün ölkəyə bir çox ekspertlərimizi, məsləhətçilərimizi gətirmişik. İnanıram ki, bu proses davamlı olacaq. Azərbaycandakı şirkətimiz keçən il iki dəfə böyüyüb, bu il daha da böyüməyi planlaşdırırıq. Ümidvaram ki, bu hələ yolun başlanğıcıdır. Biz ölkəyə insan resursları cəlb edirik, eyni zamanda, universitetlərə, tələbələrə və mütəxəssislərə texnologiyalarımızın öyrədilməsi üçün sərmayə sərf edirik, kadr potensialını artırırıq. Şübhəsiz ki, bazar artımının məhdudiyyətlərindən biri məhz bu texnologiyaları həm Azərbaycanın tərəfdaşı olan ölkələrdə, həm də sifarişçi ölkələrdə tətbiq edə bilən ekspertlərin sayıdır”, - deyə o əlavə edib.

Builki tədbirin populyarlığından danışan Aleksandr Meteçko deyib: “Bu gün Bakıda belə bir mötəbər forumda bu qədər yeni simanın iştirak etdiyini gördüyüm üçün çox şadam. Tədbirə 400-dən çox iştirakçı qatılıb”. Onun sözlərinə görə, daha əvvəl Azərbaycanda heç vaxt belə böyük sənaye tədbiri keçirilməyib.

“Burada sifarişçilərimizdən başqa, birgə işləyəcəyimiz və rəqəmsal transformasiya, innovasiya və informasiya texnologiyalarının inkişafı istiqamətində kömək edəcəyimiz bir çox yeni şirkətləri, yeni simaları gördüyüm üçün çox məmnunam”, - deyə, Multi-country SAP təmsilçisi bildirib. (Azərtac)