SOSİAL MEDIA

AMEA İnformasiya Texnologiyaları İnstitutunun 17 saylı şöbəsinin növbəti seminarı keçirilib.

AMEA-dan Xeberler.az-a verilən məlumata görə, “Sosial medianın aspektlərinin analizi” mövzusunda təqdimatla çıxış edən institutun dissertantı Leyla Məmmədova sosial medianın insanların fikirlərini məkan və zaman məhdudlaşdırması olmadan ifadə etməsini təmin edən, internetin təqdim etdiyi multimedia xüsusiyyətlərini sərhədsiz olaraq istifadə imkanı verən interaktiv mühit, geniş əsaslı platforma olduğunu bildirib.

Leyla Məmmədova ilk sosial media nümunələrinin 1990-illərdə meydana çıxdığını diqqətə çatdıran məruzəçi veb 2.0 texnologiyasıının yaradılması ilə sosial medianın sürətlə inkişaf etdiyini deyib.

O, internetdə ilk sosial şəbəkənin olan 1995-ci ildə Rendi Konrad tərəfindən yaradıldığını qeyd edib.

Sosial medianın formaları barədə danışan məruzəçi onun sosial şəbəkələr, forumlar, bloqlar, internet-icmalar, müəllif layihələri və s. növlərinin xüsusiyyətləri şərh edilib.

Sosial şəbəkələrin sosial medianın ən geniş yayılmış növü olduğunu önə çəkən L.Məmmədova bildirib ki, bu gün dünyada insanların üçdə iki hissəsi müntəzəm olaraq sosial şəbəkələrə daxil olur, onların imkanlarından bəhrələnir. Onun sözlərinə görə, sosial şəbəkələrin, multimedia özəlliyi məhdud imkanlı istifadəçilər üçün də əlverişli informasiya və kommunikasiya vasitəsidir:

“Hipermətn, interaktivlik, arxivləşdirmə, coğrafi məhdudiyyətin olmaması, multimedia kimi xüsusiyyətlərə malik sosial medianın mətbuat, radio və televiziyanın təqdim etdiyi informasiyanı qəbul edən homogen cəmiyyətdən fərqli olaraq, məlumatları çeşidləyən, məzmun yaradan, paylaşan, fərqli maraq sahələrinə və qruplara daxil edən heterogen insan birlikləri formalaşdırır”.

Sosial mediadan, həmçinin təhsil və təlim məqsədilə istifadə olunduğunu söyləyən L.Məmmədova virtual elektron kitabxanalar, virtual ensiklopediyaların tədris üçün yaratdığı geniş imkanları nəzərə çatdırıb.. Onun sözlərinə görə, dünyanın qabaqcıl ölkələrində artıq sosial şəbəkələrdən istifadə qaydaları, təhqirin yolverilməzliyi, şəxsiyyət hüquqlarının qorunmasının tədrisi həyata keçirilir.

AMEA-nın akademik-katibi, İnformasiya Texnologiyaları İnstitutunun direktoru, akademik Rasim Əliquliyev təqdimatın elmi tutumunu artırmaq üçün mövzu ilə bağlı tədqiqatlar aparan elmi mərkəzlərin, alimlərin, müvafiq tədqiqatlara həsr olunan elmi jurnalların araşdırılmasını tövsiyə edib. Tədqiqatın nəticəsi olaraq konseptual yanaşma, baxış ortaya qoymağın zəruriliyini qeyd edən alim tədqiqat işində arxitektur, çoxsəviyyəli yanaşmanın da vacibliyini bildirib.

Günel