"E-Polis mobil tətbiqi yenilənib. Hamı üçün faydalı ola biləcək "102 SOS" artıq aktivdir".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspert bildirib ki, görünür E-Polis mobil tətbiqi bir neçə gün öncə yenilənib və yeni xidmətlər yaradılıb.
Osman Gündüzün sözlərinə görə, ən çox diqqətini cəlb edən isə "İtirilmiş əşyaların tapılmaması ilə bağlı arayış üçün müraciətin qəbulu" xidməti olub:
"Maraqlı, faydalı və çox sayda insanlar üçün gərəkli ola biləcək bir xidmətdir. Əvvəllər bunun üçün polisə getmək, ərizələr yazmaq, elanlar vermək lazım gəlirdi. İndi isə sadəcə tətbiqdə itən əşyaları seçib müraciəti göndərmək yetərlidir".
Ekspert qeyd edib ki, E-Polis-də digər yeniliklər "Nəqliyyat vasitəsinin idarə edilməsi üzrə sorğuların qəbulu", "AYNA cərimələri haqqında məlumat və ödəniş" və "Arxiv arayışlarının verilməsi üçün müraciətin qəbulu" xidmətləridir:
"Ən çox diqqət çəkən məqamlardan daha birisi də "102 SOS" xidmətilə bağlıdır. Əvvəlki versiyalarda 102 xidmətinə video və audio faylların göndərilməsi, yazılı müraciət nəzərdə tutulmuşdu. E-Polisin yeni versiyasında isə artıq xidmətə birbaşa zəng üçün "102 SOS" DÜYMƏSİ yerləşdirilib. Bu düyməni basmaqla birbaşa "102 xidmətə " bağlanmaq olar".
Osman Gündüz güman edir ki, növbəti mərhələdə "102 SOS" vasitəsilə ən yaxınlıqda olan polislə əlaqə yaratmaq imkanı da reallaşdırılacaq.
Beləliklə, E-Polisə 5 yeni xidmət əlavə edilib.
