Ekspert müsabiqəyə çıxarılan radiotezliklə bağlı mübahisəyə rəy bildirib

12-12-2019 / 11:07
MTRŞ ümumrespublika radio kanalının açılması üçün Bakı şəhəri və Abşеrоn yarımadası ərazisində 102,0 MHz tezliyə müsabiqə elan edib. Artıq 4 şirkət də müraciət edib.
 
Xeberler.az bildirir ki, 102.0 MHz efir radio tezliyi uzun illər Çingiz Mustafayevin adı ilə bağlı olan “ANS ÇM” radiostansiyasının istifadəsində olub. 2016-cı ildə “ANS-ÇM”-in lisenziyasına xitam veriləndən sonra həmin tezlik resursu boş qalıb. MTRŞ -nin bu tezliyi müsabiqəyə çıxarması birmənalı qarşılanmayıb. Hətta tanınmış ziyalılar və ictimai xadimlər bununla bağlı ölkə başçısına müraciət ediblər.
 
Azərbaycan İnternet Formunun Prezidenti, İnformasiya texnologiyaları üzrə ekspert Osman Gündüz mövzu ilə bağlı bunları deyib:

"1. MTRŞ -in müsabiqə qərarı qanunidir. Allahın bəxş etdiyi bir təbii resurs olan tezlik resursu dövlətə məxsusdur. Dövlət onu hansısa müddətə istifadəyə verir. O zaman ANS ÇM bu haqqı qazanıb və ölkənin informasiya mühitinin inkişafında müstəsna rol oynayıb. Necə ki dövlətə məxsus olan hansısa bir əmlakın və ya nəyinsə istifadəsiz qalmağı ziyanlıdır, həmin yanaşma boş qalan tezliyə də aiddir. MTRŞ də dövlət qurumu olaraq, öz səlahiyyəti çərçivəsində addım atıb.

2. Şəxsən mən arzulayardım ki, bu tenderi ilk müstəqil radio olan ANS ÇM-in adı ilə bağlı qurum qazansın. Amma dövlətə məxsus tezlik resursunun digər prinsiplərlə, müsabiqədən kənar bölüşdürülməsi doğru olmazdı. Tenderə qatılan bəzi qurumlara müraciət etmək olar ki, ANS ÇM xeyrinə geri çəkilə bilərlər. Bu, daha uyğun variant olardı. Amma iştirak da onların haqqıdır. Hökuməti isə bu dövlət resursunu müsabiqəyə çıxarmaqda ittiham etmək ümumiyyətlə doğru olmazdı.

3. Düşünürəm ki, MTRŞ rəqəmli yayım problemini tezliklə həll etməlidir. Hətta , rəqəmsal problemi həll edəndən sonra 102Mhz tezliyi müsabiqəyə çıxarmaq daha faydalı ola bilərdi. Ümumiyuətlə mən MTRŞ-in tezlik resurslarından səmərəli istifadə etdiyini , efirə normal nəzarət etdiyini düşünmürəm. Adicə, digər bir dövlət qurumunun ildə 4 dəfə efiri tam olaraq söndürməsinə MTRŞ-in laqeyd qalması bunun göstəricisidir.

4. Halallıq məsələsi isə yalnız bir halda müzakirə predmeti ola bilər. Mütəxəssislər bilir ki, hansısa tezlik resursunu istifadəyə tam hazırlamaq üçün xeyli xərc çəkmək lazım gəlir. Yəni bəlli tezlik resursu başqa radiorabitənin müdaxilələrinə məruz qalır. Adətən bu təmizləmə xərclərini Dövlət Radiotezliklər İdarəsi çəkir. Amma bəzən bunu tezlik əldə edənin də üzərinə qoyurlar. Əgər zamanında 102Mhz sahiblərinin belə xərcləri olubsa, hansı ki, onu qanunla dövlət qurumu etməliydi, amma ola bilər ki, bunu ANS ÇM edib. Tenderə qatılan qurumların bunu nəzərə alması da bir vicdan, halallıq məsələsi ola bilər. Yəni qalib gələn digər qurum, sadəcə bunu nəzərə ala və ya almaya bilər".

Osman Gündüz məsələ ilə bağlı bəzi ictimai xadimlərin imzaları olan müraciətə də diqqət edib: "Düşünürəm ki, problemin yuxarıda 2-ci bənddə yazdığım çərçivədə həlli daha ağlabatan və qanuni ola bilər. Yəni, qanuni yol odur ki, bəlkə də müraciətin ünvanı dəyişməlidir"

ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə