TƏHLİL VƏ RƏYLƏR

Azərbaycan İnternet Forumunun Prezidenti, ekspert Osman Gündüz Prezidentin geri qaytardığı rəqəmsal güzəştlərlə bağlı qanunun yenidən qəbul edilərək təsdiqlənməsini şərh edib. O, sosial şəbəkə hesabında bu barədə paylaşım edib.

Xeberler.az məlumat verir ki, İT sektoruna geniş vergi və digər güzəştləri nəzərdə tutan qanun Milli Məclis tərəfindən iyulun 14-də qəbul edilmişdi. Prezident onu imzalamadan yenidən baxılması üçün parlamentə qaytarmışdı. Sonradan Prezidentin köməkçisi Şahmar Mövsümov parlamentdə iştirak edərək qanunun təkmilləşdirilmiş variantını təqdim etmişdi. Müvafiq qanunvericilik dəyişiklikləri oktyabrın 22-də təsdiqlənib.

O.Gündüz əsas yenilikləri belə sıralayıb:

• Texnopark rezidentləri üçün müəyyən şərtlərlə 20 illik vergi və sosial sığorta güzəştləri nəzərdə tutulur.
• İri İT şirkətlərinin güzəştlərdən yararlanması yalnız ixrac göstəriciləri və ixrac gəlirlərinin ölkəyə daxil olması ilə şərtləndirilir. Əvvəlki versiyada belə məhdudlaşdırma yox idi.
• Startaplara və vençur investisiyalarına yeni vergi təşviqləri tətbiq edilir.
• Frilanserlərin, rəqəmsal səyyahların və xarici İT mütəxəssislərinin fəaliyyəti üçün yeni hüquqi imkanlar yaradılır.
• İnnovativ məhsulların dövlət satınalmalarında iştirakı asanlaşdırılır, pilot layihələrin tətbiqi üçün mexanizmlər müəyyən edilir.
• Tədqiqat, innovasiya və yeni texnoloji məhsulların yaradılması üçün əlavə vergi təşviqləri nəzərdə tutulur.

Ekspertin sözlərinə görə, bu güzəştlər yerli ekosistemin inkişafının sürətləndirilməsi baxımından çox əhəmiyyətlidir. O vurğulayıb ki, xüsusilə startapların dövlət satınalmalarına çıxışı, investorların təşviqi və iri şirkətlər üçün ixrac şərtləri sektorda yeni inkişaf imkanları aça bilər.

O.Gündüz hesab edir ki, dəyişikliklər böyük İT şirkətlərinin inkişafını da stimullaşdıracaq, onların dövlət sifarişlərindən asılılığını azaldacaq, xarici bazarlara çıxışına və rəqabətqabiliyyətli texnoloji məhsullar yaratmasına ciddi stimul verəcək. Ekspert təəssüflə qeyd edib ki, bu istiqamətdə dəyişikliklər xeyli gec reallaşdı.

“İndi əsas məsələ qanunun necə tətbiq olunmasıdır”, - deyə o bildirib. O.Gündüz xatırladıb ki, əvvəllər güzəştlərdən yararlanan İT şirkətlərinin texnopark rezidenti kimi təsdiqi prosesi şəffaf olmayıb, qanunvericilikdə nəzərdə tutulan struktur isə formalaşmayıb.

Ekspert güzəştlərin verilməsinin şəffaf olmasının, nəticələrin ölçülməsinin və dövlət dəstəyinin real iqtisadi faydasının qiymətləndirilməsinin vacibliyini vurğulayıb.