Bu gün Prezidentin fərmanı ilə RİNN tabeliyində İnnovasiya və Rəqəmsal İnkişaf Agentliyinin vəsaitindən istifadə
qaydası yeni redaksiyada təsdiqlənib.
Xeberler.az məlumat verir ki, bununla bağlı Azərbaycan İnternet Formunun Prezidenti, ekspert Osman Gündüz açıqlama verib.
Ekspert qeyd edib ki, əvvəllər də belə bir qayda vardı. Lakin demək olar ki, işləmirdi. Yəni İRİA-nın bünövrəsi qoyulandan sonra xatırladığım odur ki, bir-iki layihəyə (Caucasus Ventures və s. ) yatırımlar edə bilmişdi. Onların da hələlik elə bir effekti olmayıb:
"İndiyədək bu qurum tərəfindən startaplara, yaxud hansısa bir innovativ, texnoloji layihələrə, rəqəmsal layihələrə investisya ayırmaq, qrantlar vermək, maliyyə dəstəyi göstərməklə bağlı addımları olmayıb.
Xatırladıram ki, ötən il dərc edilən Global İnnovasiya Hesabatında da Azərbaycanın bu sektorda xeyli gerilədiyi qeyd edilmiş, məhz sektorun maliyyə resurslarına əlçatanlığı məsələsi üzrə daha aşağı göstəricilər əldə etdiyi qeyd edilmişdi.
İndi isə yeni qaydalara göz gəzdirdikdə görsənir ki, bu sektora böyük maliyyə dəstəyi üçün mexanizmlər artıq var deyə bilərik".
Osman Gündüz bildirib ki, qaydalarda İRİA tərəfindən investisiyaların yatırılması, 10 milyonadək güzəştli kreditlərin verilməsi, 0.5 milyonadək qrantların verilməsi və digər maliyyə mexanizmləri nəzərdə tutulub:
"Xüsusilə də ölkədə ciddi problem olan, startapların ilkin inkişaf mərhələsi üçün maliyyə dəstəyilə bağlı bu qaydalarda yeni mexanizmlər nəzərdə tutulub.
Ekosistemin maliyyələşməsi və inkişafı ilə bağlı Prezidentin bu gün təsdiqlədiyi bu fərman mühüm əhəmiyyət kəsb edir".
Ekspert ümid edir ki, İRİA qısa zamanda bu mexanizmlərin reallaşması üçüm maraqlı tərəfləri cəlb edərək şəffaf və ədalətli sistem formalaşdıra biləcək:
"Yeni maliyyə mexanizmlərindən effektiv istifadə olunarsa inanıram ki, ölkədə qısa zamanda startap və innovasiya sektorunda ciddi irəliləyişlər müşahidə edə biləcəyik.
İndi qalır yalnız bir məsələ.
İRİA-ya bu vəsaitin hökumət tərəfindən tez bir zamanda ayrılması.
Ümid edirəm Qaydalar kağız üzərində qalmayacaq, hökumət zamanında İRİA-ya maliyyə resursları ayrılacaq və innovasiya və startap ekosistemin inkişafı üçün bu mexanizmlərdən effektiv istifadə edəcək".
