TƏHLİL VƏ RƏYLƏR

İnformasiya texnologiyaları üzrə ekspert Osman Gündüz İnnovasiya və Rəqəmsal İnkişaf Agentliyinin (İRİA) “texnopark rezidentləri” mövzusunda keçirdiyi qapalı tədbirlə bağlı yeni məqamlar açıqlayıb.

Osman Gündüz bu barədə Facebook hesabında paylaşım edərək bildirib ki, qısa araşdırma nəticəsində tədbirin yalnız qapalı keçirilmədiyi, eyni zamanda İT sektoru, İT biznesi və ixracla bağlı heç bir aidiyyəti dövlət qurumunun müzakirəyə dəvət edilmədiyi məlum olub.

Ekspertin sözlərinə görə, məsələ Azərbaycan Prezidentinin 30 dekabr 2022-ci il tarixli, İT sektoruna güzəştlər nəzərdə tutan fərmanının icrası ilə birbaşa bağlıdır. Lakin Rəqəmsal İnkişaf və Nəqliyyat Nazirliyi (RİNN) və İRİA bu fərmanın icrasını, eləcə də İT sektoruna tətbiq olunan güzəşt mexanizmini düzgün qura bilməyib.

Osman Gündüz diqqətə çatdırıb ki, İRİA-nın tədbirlə bağlı yaydığı məlumatda sözügedən Prezident fərmanının nə icrasına, nə də ümumiyyətlə adına yer verilib. Onun fikrincə, bu, sanki mövzunun tədbirlə əlaqəsi olmadığı təsiri yaradır.

Paylaşımda qeyd olunur ki, fərmanın qəbulundan artıq 3 il keçməsinə baxmayaraq, güzəştlərdən əldə olunan real nəticələr barədə ictimaiyyətə heç bir açıqlama verilməyib. Eyni zamanda, ixracyönümlü fəaliyyəti olmayan və əsasən dövlət sifarişləri hesabına fəaliyyət göstərən iri İT şirkətlərinin rezident statusundan necə yararlanması, eləcə də kiçik və orta biznesin və startapların bu mexanizmdə niyə arxa planda qalması ilə bağlı da məlumat yoxdur.

Ekspert, həmçinin rezident statusunun verilməsi üçün qanunvericilikdə nəzərdə tutulan Ekspertlər Şurasının yaradılmamasını prosesin şəffaflığına marağın olmadığının göstəricisi kimi qiymətləndirib.

Osman Gündüz xatırladıb ki, oxşar vəziyyət daha əvvəl İRİA-nın Technest layihəsində də yaşanmışdı. Həmin vaxt on milyonlarla manat vəsaitin fəaliyyəti şübhə doğuran təlim mərkəzlərinə yönəldildiyi iddia edilmiş və sonradan RİNN məsələ ilə bağlı araşdırma aparmağa məcbur qalmışdı.

Diqqətçəkən digər məqam isə qapalı tədbirdən yayımlanan fotolarda iştirakçıların kimliyinin açıq şəkildə göstərilməməsidir. Ekspertin bildirdiyinə görə, hətta bəzi iştirakçılara tədbirlə bağlı şəkillərin paylaşılmasının qadağan edildiyi ilə bağlı məlumatlar da var.

Osman Gündüz paylaşımının sonunda bu cür qapalı, selektiv və səmərəsiz müzakirələrin hansı məqsədə xidmət etdiyinin anlaşılmaz olduğunu vurğulayıb.