TƏDBİRLƏR

Azərbaycan Respublikası Prezidentinin Sərəncamı ilə artıq altı ildir ki, hər il 6 dekabr tarixi "Rabitə və informasiya texnologiyaları sahəsi işçilərinin peşə bayramı günü" kimi qeyd olunur. 6 dekabr Azərbaycanda ilk telefon xəttinin çəkilişi tarixinə təsadüf etdiyindən bu təqvim həm də rabitənin təşəkkülü kimi də təqvimə düşüb. 

Xeberler.az bildirir ki, bu münasibətlə Rabitə və yüksək texnologiyalar naziri səlahiyyətlərini icra edən, nazirin birinci müavini Ramin Quluzadə Rabitə və informasiya texnologiyaları sahəsi işçilərini təbrik edib.

"Azərbaycan Respublikası Prezidentinin 2 dekabr 2006-cı il tarixli Sərəncamına əsasən, hər il dekabr ayının 6-sı rabitə və informasiya texnologiyaları sahəsi işçilərinin peşə bayramı günü kimi qeyd edilir.

Zəngin tarixə malik Azərbaycan rabitəsinin ən parlaq inkişaf dövrü ümummilli liderimiz Heydər Əliyevin adı ilə sıx bağlıdır. Ulu öndərin hakimiyyətdə olduğu illərdə böyük inkişaf yolu keçən Azərbaycan rabitəsi hazırda Prezident İlham Əliyevin müəyyən etdiyi prioritet və yeni hədəflərlə sürətlə inkişaf edir.

Bu gün ölkəmiz, həmçinin yüksək texnologiyalar sahəsində regionun lider dövləti kimi tanınır. Bu nailiyyətlər 134 illik tarixi təcrübəyə və həyata keçirilən islahatlara, strategiyaya söykənir.

Əminəm ki, birgə əməyimiz nəticəsində bundan sonra daha böyük nailiyyətlərə imza atmaqla bizə göstərilən etimadı önəmli işimizlə layiqincə doğruldacağıq.

Peşə bayramınızı təbrik edir, hər birinizə işlərinizdə uğurlar arzulayıram.

Ramin Quluzadə

Rabitə və yüksək texnologiyalar nazirinin birinci müavini"

Xeberler.az