Azərbaycanda ilk telefon xətti bu gün işə düşüb

06-12-2015 / 12:06

Dekabrın 6-sı rabitə və informasiya texnologiyaları sahəsi işçilərinin peşə bayramıdır.

Azərbaycan Respublikasının Prezidenti İlham Əliyevin 2006-cı il 2 dekabr tarixli Sərəncamına əsasən hər il dekabrın 6-sı ölkəmizdə rabitə və informasiya texnologiyaları sahəsi işçilərinin peşə bayram kimi qeyd edilir.

Bu bayramın təsis olunması Azərbaycanda ilk telefon xəttinin işə düşməsi ilə bağlıdır.

Belə ki, 1881-ci il dekabrın 6-da Bakıda “Nobel qardaşları” cəmiyyəti tərəfindən ilk telefon xətti çəkilmişdi.

Ölkəmizdə rabitə sahəsi ümummilli lider Heydər Əliyevin hakimiyyəti illərində xüsusilə inkişaf etməyə başlayıb. Ötən əsrin 70-80-ci illərində poçt, teleqraf və teleradio proqramlarının yayımı sahəsində diqqətəlayiq nailiyyətlər qazanılmışdı. Bakıda Rabitə evi, onlarla rayon mərkəzində rabitə qovşaqları üçün binalar, 300-dən çox poçt şöbəsi binası tikilmişdi. 1979-cu ildə 310 metr hündürlüyə malik yeni teleqüllənin layihəsi təsdiq edilmiş və 1981-ci ildə obyektin tikintisinə başlanılmışdı. Bir sıra obyektiv və subyektiv səbəblər üzündən ləngiyən tikinti işlərini ulu öndər Heydər Əliyevin Azərbaycana ikinci dəfə rəhbərlik etdiyi dövrdə başa çatdırmaq mümkün olmuşdu.

Son illər ölkəmizdə informasiya texnologiyaları sektoru sürətlə inkişaf edir. İnformasiya-kommunikasiya texnologiyaları (İKT) sahəsi üzrə gəlirlərin artım tempi dünya üzrə bu göstəricini bir neçə dəfə üstələyir. Azərbaycanda rabitə və İKT sektorunun hazırkı sürətli inkişafı Ümummilli Liderin siyasi kursunu uğurla davam etdirən Prezident İlham Əliyevin xüsusi diqqət və qayğısı nəticəsində əldə olunub.

Azərbaycan rəqəmli fərqliliyin aradan qaldırılması və regionun İKT mərkəzinə çevrilməsi istiqamətində bir sıra mühüm irimiqyaslı regional layihələr həyata keçirir. “Trans-Avrasiya Super İnformasiya Magistralı”, milli telekommunikasiya peykinin orbitə çıxarılması, İnformasiya Texnologiyalarının İnkişafı Dövlət Fondunun, Yüksək Texnologiyalar Parkının, Elektron Təhlükəsizlik Mərkəzinin yaradılması bu sektor üzrə həyata keçirilən işlərin yalnız bir qismidir.

Qeyd edək ki, Rabitə və yüksək texnologiyalar naziri səlahiyyətlərini icra edən, nazirin birinci müavini Ramin Quluzadə ötən gün Rabitə və informasiya texnologiyaları sahəsi işçilərini təbrik edib.

 

Xeberler.az


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.