PROQRAMLAR

Beynəlxalq texnologiya şirkəti Everpure Rasim Bəxşini Cənubi Qafqaz və Mərkəzi Asiya regionu üzrə ərazi satış meneceri vəzifəsinə təyin edib.

Xeberler.az məlumat verir ki, yeni vəzifəsində Rasim Bəxşi şirkətin regionda biznesinin inkişafı, tərəfdaşlar və müştərilərlə əməkdaşlığın genişləndirilməsi, həmçinin Everpure həllərinin bazarda təşviqi istiqamətində fəaliyyət göstərəcək.

Qeyd edək ki, informasiya texnologiyaları və korporativ satışlar sahəsində təxminən 30 illik təcrübəyə malik olan Rasim Bəxşi karyerası ərzində rəqəmsal transformasiya layihələrinin həyata keçirilməsi, tərəfdaş şəbəkələrinin qurulması və korporativ müştərilər üçün texnoloji həllərin tətbiqi sahələrində çalışıb.

O, Everpure-a qoşulmazdan əvvəl Lenovo Global Technology Azerbaijan şirkətinin direktoru vəzifəsində işləyib. Həmin dövrdə iştirak etdiyi mühüm layihələrdən biri Azərbaycanın ən böyük bulud xidmətləri provayderi olan AzInTelecom bazasında ölkənin ilk superkompüter mərkəzinin yaradılması olub. Mərkəz yüksək məhsuldarlıqlı Lenovo ThinkSystem serverləri üzərində qurulub.

Rasim Bəxşi təyinatla bağlı LinkedIn səhifəsində paylaşdığı fikirlərdə bildirib ki, məlumatların biznes üçün əsas resursa çevrildiyi və süni intellekt texnologiyalarının yeni imkanlar yaratdığı bir dövrdə fəaliyyət göstərirlər.

“Biz elə bir dövrə qədəm qoymuşuq ki, məlumatlar biznes üçün açar resursa çevrilir, süni intellekt isə onlardan istifadə üçün yeni imkanlar açır. Karyeram boyu mən təşkilatlara məlumatlardan maksimum dəyər əldə etməyə kömək edən texnologiyalarla işləməyə çalışmışam. Buna görə də Everpure-a qoşulmaq mənim üçün məntiqli addım və şirkətin, eləcə də onun regiondakı müştərilərinin inkişafına töhfə vermək imkanı oldu”, – deyə o qeyd edib.

Məlumata görə, təyinat Everpure-in Cənubi Qafqaz və Mərkəzi Asiya bazarlarında mövqeyini gücləndirmək strategiyasının tərkib hissəsidir. Son illərdə regionda məlumatların saxlanılması, qorunması və idarə olunması həllərinə marağın artması, bulud texnologiyaları, analitik platformalar və süni intellekt layihələrinin genişlənməsi şirkətin fəaliyyət istiqamətlərinə əlavə imkanlar yaradır.