Roblox 2026-cı ilin iyun ayından etibarən uşaqlar üçün xüsusi hesab növlərini istifadəyə verəcək. Yeni sistemə əsasən, istifadəçilər yaş qruplarına görə fərqləndiriləcək və bu, onların hansı oyunlara daxil ola biləcəyini müəyyən edəcək.
Xeberler.az bildirir ki, 5–9 yaş arası uşaqlar üçün Roblox Kids adlı hesablar yaradılacaq. Bu hesablarda yalnız ən aşağı yaş reytinqinə malik oyunlara giriş mümkün olacaq. Varsayılan olaraq çat funksiyası deaktiv olacaq və yalnız valideyn icazəsi ilə müəyyən istifadəçilərlə aktiv edilə biləcək.
9–15 yaş arası istifadəçilər üçün isə Roblox Select hesabları təqdim olunacaq. Bu kateqoriyada orta səviyyəli məzmunlu oyunlar əlçatan olacaq və ünsiyyət yalnız eyni yaş qrupundakı istifadəçilərlə mümkün olacaq.
Valideynlər bəzi hallarda uşaqlara yaş məhdudiyyəti olan oyunlara giriş icazəsi verə biləcəklər. 18 yaşdan yuxarı istifadəçilər isə məhdudlaşdırılmış məzmuna çıxış əldə edəcək. Yeni hesablar iyun ayında istifadəyə veriləcək və keçid dövründə istifadəçilər yaş təsdiqi prosesindən keçə biləcəklər.
