SÜNİ İNTELLEKT VƏ DATA

Papa XIV Leo dünya ictimaiyyətinə müraciətində xəbərdarlıq edib ki, süni intellekt gənclərin intellektual, nevroloji və mənəvi inkişafına mənfi təsir göstərə bilər.

Xeberler.az “Associated Press”ə istinadən məlumat verir ki, Roma Papası Müqəddəs Taxt-Tacın yeni texnologiyalara və onların bəşəriyyət üçün nə demək olduğuna dair narahatlığının əlaməti olaraq cümə günü, iyunun 20-də bir hissəsi Vatikanda baş tutan süni intellekt və etika konfransına müraciət göndərib.

Pontifik bildirib ki, süni intellektin sonrakı inkişafı dünya əhalisinin müxtəlifliyinə hörmətlə yanaşılmaqla hər bir insanın ləyaqətini qorumaq ehtiyacının “üstün etik meyar”ına uyğun olaraq qiymətləndirilməlidir. O, xəbərdarlıq edib ki, bəşəriyyət heç vaxt informasiyaya bu qədər sürətli çıxış əldə etmədiyi üçün yeni nəsil böyük risk altındadır. Roma Papası qeyd edib: “Həqiqi müdriklik məlumatların mövcudluğu ilə deyil, həyatın əsl mənasını dərk etməklə daha çox bağlıdır”.

Papa Fransiskin vəfatından sonra may ayında Katolik kilsəsinin rəhbəri seçilən Leo süni intellektin insan ləyaqətini, ədalətini və əməyini müdafiə etmək üçün problemlər yaratdığını qeyd edərək bəşəriyyətin üzləşdiyi ən kritik məsələlərdən biri olduğunu bildirib. O, süni intellektlə bağlı narahatlığını öz adaşı - Papa XIII Leoya istinadla izah edib. Həmin Leo Sənaye İnqilabının şəfəqində Vatikana başçılıq edib və işçilərin acınacaqlı vəziyyətini, onların hüquq və ləyaqətini təmin etmək ehtiyacını əsas prioritet kimi irəli sürüb.

Fransisk həyatının sonuna yaxın süni intellektin bəşəriyyət üçün yaratdığı təhlükələr haqqında getdikcə daha çox çıxış edib səsləndi və onu tənzimləmək üçün beynəlxalq müqavilənin imzalanmasına çağırıb. O bildirib ki, siyasətçilər süni intellektin insan mərkəzli qalmasına əmin olmaq üçün liderlik etməlidirlər ki, silahların və ya daha az öldürücü alətlərin nə vaxt istifadə ediləcəyi ilə bağlı qərarlar həmişə maşınlar deyil, insanlar tərəfindən qəbul edilsin.

Roma Papası müraciətində deyib: “Əminəm ki, hər birimiz uşaqlar və gənclərin süni intellektdən istifadəsinin onların intellektual və nevroloji inkişafı üçün mümkün nəticələrindən narahatdır. Cəmiyyətin rifahı, onlara Tanrı tərəfindən verilmiş qabiliyyətləri inkişaf etdirmək bacarığından və məlumat əldə etməyi zəka amili ilə qarışdırmağa imkan verməməsindən asılıdır”.