"Azərbaycanın startap və innovasiya sahəsində beynəlxalq reytinqlərdə gerilədiyi bir zamanda yeni bir İnnovasiya Mərkəzinin fəaliyyətə başlaması diqqət cəlb edəndir".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz İnnovasiya Mərkəzinin istifadəyə verilməsini şərh edərkən deyib.
Osman Gündüzün sözlərinə görə, uzun müddətdən bəri gözlənilirdi və müzakirə olunurdu ki, RİNN, İnnovasiya və Rəqəmsal İnkişaf Agentliyi bir İnnovasiya Mərkəzi istifadəyə verəcək:
"Ötən gün bu tədbir baş tutsa da, əslində ekosistem iştirakçıları arasında müzakirə olunan bir Mərkəzlə deyil, bir qədər fərqli məkanla rastlaşdıq. İndiyədək bu istiqamətdə olan müzakirələr və mesajları nəzərə alsaq daha fərqli bir məkanla rastlaşacağımızı gözləyirdik".
Ekspert bildirib ki, açılış məraisimində çıxış edən rəsmilər görünür ki, bu tip sualların ola biləcəyini nəzərə alaraq yaxın zamanlarda bu tip daha böyük bir İnnovasiya Mərkəzinin də istifadəyə veriləcəyini bildirdilər. Regionlarda, digər şəhərlərimizdə də bu tip mərkəzlərin yaradılması planlaşdırılıb:
"İstənilən halda, Azərbaycanın startap və innovasiya ilə bağlı beynəlxalq reytinqlərdə çox aşağı yerlərdə oturuşduğu bir zamanda İRİA-nın partnyorlarla birgə Azərbaycan İnnovasiya Mərkəzi kimi bir ekosistem oyunçusunu formalaşdırması çox əhəmiyyətlidir və təqdirəlayiqdir".
Osman Gündüz qeyd edib ki, Azərbaycan İnnovasiya Mərkəzidən gözləntilər çoxdur:
"Ekosistemi canlandırmaq lazımdır. Sektorda problemlərimiz daha çoxdur. Dünyada, region ölkələrində bu istiqamətdə daha ciddi irəliləyişlər, bu sektora daha böyük yatırımlar müşahidə olunur. İRİA, KOBİA, ASAN və bu sahədə çalışan özəl qurumlarımız birgə səylərini gücləndirməlidirlər. Azərbaycan İnnovasiya Mərkəzi ekosistemin oyunçularını, maraqlı tərəfləri, xarici şirkətləri və tərəfdaşları bir araya gətirən, şəbəkələşməyə şərait yaradan, yeni tərəfdaşlar əldə etməyə imkan verən bir Mərkəzə çevrilməlidir. İlkin inkişaf dövrünə qədəm qoyan startapların dəstəklənməsinə, onların investisiya əlçatanlığına daha ciddi diqqət yetirilməlidir".
Son olaraq Osman Gündüz ümid edir ki, Azərbaycan İnnovasiya Mərkəzi ölkədə innovasiya və startap ekosisteminin bütün maraqlı tərəflərini birləşdirən güclü bir innovativ mərkəzə çevriləcək.
