Məlumat verdiyimiz kimi, bu il nüfuzlu "Qlobal İnnovasiyalar İndeksi 2022” reytinqində Azərbaycan innovasiyaların səviyyəsinə görə 13 pillə geriləmişdi.
Belə bir vəziyyətdə, Paşa Holding və İnnovasiya və Rəqəmsal İnkişaf Agentliyi tərəfindən təşkil olunan İllik İnnovasiya Sammiti 2022 diqqət cəlb edirdi.
"Tədbirdən ciddi gözləntilər vardı. Həm də nəzərə alsaq ki, bu tədbirdə iki nazir real olaraq və bir nazir də virtual olaraq iştirak edirdi. Sammitdə diqqətimi cəlb edən o oldu ki, adı çəkilən Agentliyin sədr əvəzi də çıxışına innovasiyalar sahəsində geriləməyimizi qeyd etməklə başladı. Görünür qurum, Nazirlik baş verənlərin fərqindədir".
Bunu Xeberler.az-a Azərbaycan İnternet Forumunun prezidenti, ekspert Osman Gündüz sammiti şərh edərkən deyib.
Onun sözlərinə görə, sammitdəki çıxışlarında Nazirlər Rəşad Nəbiyev və Mikayıl Cabbarov innovasiya ekosistemin inkişafına dəstək veriləcəyini açıqlasalar da, yeni mesajlar gözə dəymədi.
"Düşünürəm ki, sektorda tənzimləyici strukturların formalaşdığı, konkret səlahiyyətli qurumların müəyyən olunduğu, özəl sektor üçün ciddi dəstək olarsa daha sürətli inkişaf üçün güclü potensial olduğu, beynəlxalq hesabatda 13 pillə gerilədiyimiz indiki şəraitdə inkişafa yönəlik daha ciddi qərarlara ehtiyac var. İnnovasiya ekosisteminin qurulmasına dəstək məqsədilə təşkil olunan bu faydalı tədbirdə maraqlı tərəflərin iştirakı təmin olunmuşdu, təşkilatçılıq yetərincə yaxşı təşkil olunmuşdu. Bununla belə düşünürəm ki, 2 nazirin real olaraq və bir nazirin virtual olaraq qoşulduğu bir sammitdə gözləntilər daha çox idi",-deyə ekspert vurğulayıb.
Osman Gündüz onu da bildirib ki, sammitdəki çıxışından bir neçə saat sonra nazir Rəşad Nəbiyev artıq Türkmənistanda Türk dövlətləri nazirlərinin bir toplantısında da iştirak və çıxış edib:
"Görünür ki, Nazirimiz yetərincə dinamikdir. Nazirliyin səlahiyyətləri da getdikcə artır. Tabeli qurumlar da ləng olsa da getdikcə formalaşır. Ölkə üzrə fiber optik infrastrukturla bağlı ciddi addımlar atılır. Gözləntilər çoxdur. Ümid edirəm və inanıram ki, qısa zamanda innovasiya və rəqəmsal sektorda son illərdə müşahidə olunan ləngimələr sürətli inkişafla əvəzlənəcək.
