MÜSAHİBƏ

Dövlət qurumlarının startap ekosistemlə bağlı statistikaları arasında ziddiyyət var.
Xeberler.az  xəbər verir ki, bunu Azərbaycan İnternet Forumunun rəhbəri, ekspert Osman Gündüz deyib. Osman Gündüzün sözlərinə görə, İnnovasiya və Rəqəmsal İnkişaf Agentliyi (İRİA) ölkədə təxminən 220 aktiv startap olduğunu açıqlayıb:

"Ötən günlər təqdim etdikləri hesabatda da bu istiqamətdə açıqlamalar veriblər. ASAN deyir ki, startapların sayı təxminən 80 ətrafındadır. Qurum startap ekosistemlərlə bağlı beynəlxalq vəziyyəti və reytinqi ölçən StartupBLink qurumunda Azərbaycanı təmsil edir. Bu statistika da həmin beynəlxalq reytinqdə görsənir. Ötən il Prezidentin köməkçisi Şahmar Mövsümov son bir ildə startap sayının 3 dəfə artdığını bildirmişdi. Lakin hansı sayın 3 dəfə artdığını qeyd etməmişdi."

Ekspert qeyd edir ki, Startup.az "Startap Azərbaycan" portalının bazasında 160-dək startapın olması görünür.

"KOBİA açıqlayıb ki, ölkədə Startap şəhadətnaməsi alanların toplam sayı 135 -dir. Beləliklə, adi bir statistika göstərir ki , dövlət qurumları arasında startap və ekosistem infrastrukturun inkişafı ilə bağlı kommunikasiya və əlaqələr olduqca zəifdir. Bu sahənin zəif inkişafı həm də bununla bağlıdır. Normalda İRİA və KOBİA statistikaları da ASAN-nın söz sahibi olduğu StartupBlink-də öz əksini tapa bilərdi.Təəssüf ki, hansısa səbəblərdən bu reallaşa bilmir" - o, əlavə edib.

"Xatırladıram ki, Azərbaycan startap ekosistemin inkişafına görə StartupBlink reytinqində çox aşağı yerlərdədir, ötən il 100 ölkə arasında 84-cü yeri qazanmışıq. Fikrimcə burada daha çox maliyyə resursları, daha çox komanda İRİA-ya məxsusdur, ondan gözləntilər daha çoxdur. Lakin son illərdə dinamika olsa da, hələlik bu sektorda gözləntilər özünü doğrultmayıb. İRİA ölkədə startap və innovasiya sahəsində kordinasiya və resursların bir yerə cəmləşdirilməsi, mühitin inkişafı və effektivliklə bağlı səylərini gücləndirməlidir" - Osman Gündüz qeyd edib.