TƏDBİRLƏR

Bu gün bütün dünyada  Ümumdünya İnformasiya Cəmiyyəti Günü olaraq qeyd edilir.
 
Xeberler.az xatırladır ki, bu Günün qeyd olunması sonradan Beynəlxalq Telekommunikasiya İttifaqı (BTİ) adlanan Beynəlxalq Teleqraf İttifaqının 17 may 1865-ci ildə əsasının qoyulması ilə sıx bağlıdır. İnformasiya Cəmiyyəti üzrə Ümumdünya Sammitinin 2005-ci ildə Tunisdə keçirilən ikinci mərhələsi çərçivəsində BMT Baş Assambleyasına 17 may tarixinin "Beynəlxalq informasiya cəmiyyəti günü" elan edilməsi ilə bağlı müraciət qəbul edilir.
 
Beləliklə, Beynəlxalq Telekommunikasiya İttifaqı 2006-cı ildə 17 may tarixinin Ümumdünya Telekommunikasiya və İnformasiya Cəmiyyəti Günü kimi qeyd edilməsi ilə bağlı qərar qəbul edir və hər il beynəlxalq səviyyədə dünyanın əksər ölkələrində 17 may tarixi ilə əlaqədar müxtəlif tədbirlər keçirilir.

Burada məqsəd isə İKT sahəsində olan problemlərə və inkişafa diqqət yönəltməkdir.

"Ümumdünya Telekommunikasiya və İnformasiya Cəmiyyəti Günü"nün əsas məqsədi və əhəmiyyəti internetdən və informasiya-kommunikasiya texnologiyalarından (İKT) istifadənin cəmiyyət və ölkələrə verdiyi imkanlar, eyni zamanda rəqəmli fərqliliyin aradan qaldırılması ilə bağlı məlumatlılıq səviyyəsinin yüksəldilməsinə kömək göstərməkdir.

Ölkəmizdə də İnformasiya Cəmiyyətinin inkişafı ilə bağlı Strategiya hazırlanıb.

Bu tarix hər il müxtəlif mövzular altında qeyd edilir və 2016-cı ildə Ümumdünya Telekommunikasiya və İnformasiya Cəmiyyəti Günü "Sosial təsirlər naminə İKT sahəsində sahibkarlıq fəaliyyəti" mövzusuna həsr edilib. 

Xeberler.az