KOSMOS

Azərbaycan kosmik sahədə bir sıra inkişaf etməkdə olan ölkələrə model olaraq təqdim edə biləcəyi uğurlara malikdir.

Xeberler.az Azərtaca istinadən məlumat verir ki, bu sözləri Milli Məclisin deputatı Vüqar Bayramov deyib.

“Milanda keçirilən 75-ci Beynəlxalq Astronavtika Konqresində müzakirə olunan mövzular, nəzərdən keçirilən məsələlər bütövlükdə qlobal çağırışlar və bu çağırışlara fərqli ölkələrin münasibətinin, o cümlədən COP29-a ev sahibliyi edəcək Azərbaycanın iqlim dəyişikliyi, eyni zamanda, BMT tərəfindən müəyyənləşdirilmiş çağırışlara reaksiyası və töhfəsidir. Ona görə ki, Azərbaycan kosmos sənayesinə, eyni zamanda, qlobal çağırışların həllinə töhfə verən ölkələrdəndir. Ölkəmizin böyük nümayəndə heyəti ilə Milan Konqresində iştirakı bunu bir daha təsdiq edir”, - deyə deputat bildirib.

Vüqar Bayramov vurğulayıb ki, çox qısa zamanda, 2009-cu ildən etibarən Azərbaycan kosmik sənayenin inkişafında ciddi uğurlara nail olub: “Həm keçən il ölkəmizdə keçirilən Beynəlxalq Astronavtika Konqresində, həm də konqresdən bir gün əvvəl nazirlər və deputatların görüşündə müzakirə olunan məsələlər qlobal kosmos potensialının istifadə edilməsi, eyni zamanda, bu sahədə fərqli ölkələrin, o cümlədən Azərbaycanın təcrübəsinin öyrənilməsi və yayılması idi. Azərbaycanın kosmos sənayesinin formalaşması və inkişafı qısa müddəti əhatə etsə belə, ölkəmiz bu sahədə bir sıra inkişaf etməkdə olan ölkələrə model olaraq təqdim edə biləcəyi uğurlara malikdir. Ona görə də, Azərbaycanın kosmos sənayesinin inkişaf etməsi həm qeyri-neft sektorunun inkişafı istiqamətində vacibdir, həm də iqlim dəyişikliyi və ətraf mühitin qorunması baxımından prioritet hədəflərin reallaşdırılmasına xidmət edir”.