TƏDBİRLƏR

Azərbaycan xalqının Ümummilli Lideri Heydər Əliyevin anadan olmasının 103-cü ildönümü münasibətilə Xüsusi Rabitə və İnformasiya Təhlükəsizliyi Dövlət Xidməti (XRİTDX) tərəfindən bir sıra tədbirlər təşkil olunub.

Xeberler.az məlumat verir ki, XRİTDX-nin rəisi general-leytenant İlqar Musayev və Xidmətin şəxsi heyəti Fəxri xiyabanı ziyarət edib, xalqımızın Ümummilli Lideri, müasir müstəqil Azərbaycanın memarı və qurucusu, dünyaşöhrətli siyasi xadim Heydər Əliyevin xatirəsini ehtiramla yad ediblər. Ulu Öndərin məzarı önünə əklil və gül dəstələri qoyulub.

Eyni zamanda, görkəmli oftalmoloq-alim, akademik Zərifə Əliyevanın da xatirəsi anılmış, məzarı üzərinə gül dəstələri düzülüb.

Tədbirlər çərçivəsində XRİTDX-nin şəxsi heyəti Heydər Əliyev Mərkəzini ziyarət edib. Ziyarət zamanı Ulu Öndərin həyat və fəaliyyətinin müxtəlif dövrlərini əks etdirən sənədlər, fotoşəkillər və eksponatlarla tanış olunmuş, həmçinin “Azərbaycan inciləri: tarixin axarında” sərgisinə baxış keçirilib.

Bununla yanaşı, şəxsi heyətin Ümummilli Lider Heydər Əliyevin həyat yolu, siyasi fəaliyyəti və dövlətçilik irsi barədə daha ətraflı məlumatlandırılması məqsədilə AEMA-nın Tarix və Etnologiya İnstitutunun şöbə müdiri tarix üzrə fəlsəfə doktoru Cəbi Bəhramov ilə görüş keçirilib.

Görüş zamanı Cəbi Bəhramov Heydər Əliyevin Azərbaycan dövlətçiliyinin möhkəmləndirilməsi, milli maraqların qorunması və ölkənin inkişafı istiqamətində həyata keçirdiyi uzaqgörən siyasət barədə danışıb, həmçinin Ulu Öndərin həyat və fəaliyyətinə dair ətraflı məlumat verib.

Xidmətin inzibati binasında Ümummilli Lider Heydər Əliyevin anadan olmasının 103-cü ildönümünə həsr olunmuş tədbir keçirilib. Tədbirdə XRİTDX-nin rəis müavini general-mayor Allahverən İsmayılov Ulu Öndərin müasir Azərbaycanın inkişafı və dövlətçiliyimizin möhkəmləndirilməsi istiqamətində həyata keçirdiyi misilsiz xidmətlərdən, milli təhlükəsizlik və dövlət idarəçiliyi sahəsində müəyyənləşdirdiyi strateji kursdan bəhs edib.

Digər çıxışçılar da Heydər Əliyevin Azərbaycan xalqı qarşısındakı tarixi xidmətlərindən danışaraq, onun siyasi irsinin bu gün də ölkəmizin inkişafında mühüm rol oynadığını vurğulayıblar.

Sonda Ümummilli Lider Heydər Əliyevin həyat və fəaliyyətindən bəhs edən sənədli film nümayiş olunub.