PROQRAMLAR

Xeberler.az məlumat verir ki, qiymətləndirmə prosesi AMEA Rəyasət Heyətinin 17 fevral 2026-cı il tarixli qərarı ilə yaradılmış komissiya tərəfindən təşkil olunub.

Tədbirdə giriş sözü ilə çıxış edən AMEA-nın prezidenti İsa Həbibbəyli bildirib ki, Akademiyada elmi fəaliyyətin yeni qiymətləndirmə modeli tətbiq olunur və rəqəmsallaşma istiqamətində mühüm addımlar atılır.

Onun sözlərinə görə, rəqəmsal cəmiyyətin sürətli inkişafı, Dördüncü Sənaye İnqilabının çağırışları, süni intellekt və yeni texnologiyalar elmi mühitdə yeni yanaşmalar tələb edir. Akademiyada aparılan struktur dəyişikliklərinin də məhz bu çağırışlardan irəli gəldiyi vurğulanıb.

Qeyd olunub ki, son illərdə AMEA-da elektron idarəetmə, rəqəmsallaşma və süni intellekt istiqamətində genişmiqyaslı islahatlar həyata keçirilir. Bu çərçivədə MDB məkanında ilk dəfə olaraq 2023-cü ilin yanvarında AMEA Rəyasət Heyəti aparatında “Elektron Akademiya” şöbəsi yaradılıb, daha sonra həmin şöbə “Rəqəmsal Akademiya, Süni intellekt və Elektron xidmətlər” şöbəsi kimi fəaliyyətini genişləndirib.

Hazırda Akademiyada elektron sənəd dövriyyəsi sistemi tətbiq olunur, elektron kitabxana və elektron arxiv quruculuğu istiqamətində layihələr həyata keçirilir. Eyni zamanda elmi müəssisə və təşkilatlarda “Elektron xidmətlər” şöbələrinin bazasında “Rəqəmsal elm sahəsi və süni intellekt” şöbələri yaradılıb.

AMEA rəhbəri bildirib ki, Prezident İlham Əliyev tərəfindən təsdiqlənmiş rəqəmsal inkişaf və süni intellekt strategiyaları, həmçinin Birinci vitse-prezident Mehriban Əliyevanın sədrliyi ilə yaradılmış Rəqəmsal İnkişaf Şurası Akademiyanın qarşısında da yeni vəzifələr müəyyənləşdirib.

Daha sonra komissiya tərəfindən elmi müəssisə və təşkilatların rəqəmsallaşma üzrə direktor müavinlərinin qiymətləndirilməsi mərhələsinə başlanılıb və namizədlərin yekun nəticələri elan olunub.

Tədbirdə çıxış edən Rasim Əliquliyev, Əli Abbasov, Şahin Mustafayev və Fariz İmranov rəqəmsal transformasiya prosesinin elmi müəssisələrdə daha da genişləndirilməsinin vacibliyini vurğulayıblar.

Sonda çıxış edən İsa Həbibbəyli qeyd edib ki, qarşıdakı dövrdə rəqəmsallaşma, süni intellekt və kibertəhlükəsizlik istiqamətində treninqlər, maarifləndirici dərslər və ixtisasartırma proqramları təşkil olunacaq.

Tədbirin yekununda institut və təşkilatların təqdim etdiyi namizədlərin elmi işlər və rəqəmsallaşma üzrə direktor müavinləri vəzifələrinə təsdiq olunması tövsiyə edilib.