TƏHLİL VƏ RƏYLƏR

Azərbaycan İnternet Forumunun prezidenti, ekspert Osman Gündüz nazirliklərdə rəqəmsallaşma, süni intellekt və kibertəhlükəsizlik üzrə məsul müavinlərin təyin olunması prosesinin ləng getdiyini bildirib.

Xeberler.az məlumat verir ki, ekspertin sözlərinə görə, təxminən 3 ay əvvəl Prezident yanında ölkənin rəqəmsal gələcəyi ilə bağlı keçirilən müşavirədə bu istiqamətdə ciddi tapşırıqlar verilib və qəbul edilən Fəaliyyət Planında dövlət qurumlarında rəqəmsal inkişaf, süni intellekt və kibertəhlükəsizlik üzrə məsul şəxslərin müəyyənləşdirilməsi nəzərdə tutulub.

Onun sözlərinə görə, sənəddə bu tapşırığın icrası üçün son müddət kimi 2026-cı ilin iyun ayı müəyyən edilib və hazırda həmin müddətin başa çatmasına cəmi bir ay qalır. Buna baxmayaraq, prosesdə nəzərəçarpacaq irəliləyiş müşahidə olunmur.

Osman Gündüz hesab edir ki, rəqəmsallaşma və süni intellekt kimi strateji sahələrdə gecikmələr yolverilməzdir. O bildirib ki, burada söhbət formal vəzifələrdən deyil, yeni idarəetmə modelinin qurulmasından və transformasiya proseslərini sürətləndirəcək konkret cavabdehlik mexanizmlərindən gedir.

Ekspert qeyd edib ki, Azərbaycanda artıq bu sahədə formalaşmış və təcrübəyə malik peşəkar kadrlar mövcuddur. Onun fikrincə, dövlət qurumlarında və özəl sektorda çalışan, böyük rəqəmsal layihələr həyata keçirmiş mütəxəssislər dərhal rəqəmsal müavin kimi fəaliyyətə başlayaraq real nəticələr verə bilərlər.

Osman Gündüz region ölkələrinin rəqəmsal iqtisadiyyat, startap ekosistemi və xüsusilə süni intellekt sahəsində sürətlə irəlilədiyini vurğulayıb. O bildirib ki, bir çox ölkələr artıq bu istiqamətlər üzrə konkret cavabdeh şəxslər və strukturlar formalaşdıraraq yeni idarəetmə modelləri qurublar.

Ekspertin sözlərinə görə, Prezidentin təşəbbüsü ilə yaradılmış yeni idarəetmə modelinin tətbiqinin gecikməsi artıq strateji riskə çevrilir və proseslər sürətləndirilməlidir.

O, həmçinin qeyd edib ki, Prezidentin fərmanı ilə yaradılan Rəqəmsal İnkişaf Şurası ilə rəqəmsal müavinlərin koordinasiyalı fəaliyyəti təmin olunarsa, bu model qısa müddətdə ciddi nəticələr verə bilər.

Ekspert əlavə edib ki, Şuranın Katibliyi funksiyasını həyata keçirən Rəqəmsal İnkişaf və Nəqliyyat Nazirliyinin bu istiqamətdə fəaliyyətini daha da gücləndirməsi vacibdir və cəmiyyətdə qurumdan gözləntilər böyükdür.