STARTAP AZƏRBAYCAN

Regional “INNOSTART” layihəsinin yekun tədbirində 12 yeni startap texnoloji həllərini nümayiş etdirib.

Xeberler.az xəbər verir ki, 1500-dən çox gənci bir araya gətirən layihə İnnovasiya və Rəqəmsal İnkişaf Agentliyinin (İRİA) dəstəyi, “SUP.VC” şirkətinin təşkilatçılığı ilə reallaşdırılıb. Belə ki, 2023-cü ilin mayında başlayan “INNOSTART” çərçivəsində ölkənin 6 regionunda ümumilikdə 33 tədbir olmaqla, innovativ sahibkarlıq və mentorluq üzrə silsilə təlimlər təşkil edilib, habelə startap inkubasiya proqramı həyata keçirilib.

Fevralın 19-da layihənin yekun tədbiri - “Demo Day” keçirilib. Proqramın məzunlarının və regional universitetlərin nümayəndələrinin də iştirak etdikləri tədbiri giriş sözü ilə açan İRİA-nın sədri İnarə Vəliyeva təlimlərin region gənclərinin innovativ potensialının üzə çıxarılması baxımından müstəsna əhəmiyyətini vurğulayıb. “Bu layihə Azərbaycanın bölgələrində yaşayan hər bir gəncə innovativ ideyasını reallığa çevirmək üçün böyük imkanlar yaradır və startap quruculuğu üzrə resursları əlçatan edir”, - deyə Agentliyin sədri bildirib.

“SUP.VC” innovasiya şirkətinin icraçı direktoru Rəşad Eyvazov qeyd edib ki, “INNOSTART” layihəsi hər bir regionun unikal ehtiyaclarını qarşılayacaq innovativ sahibkarlıq fürsətləri yaradır. Bundan əlavə, bu layihə sayəsində startap təsisçiləri öz komandalarına çatışmayan komanda üzvlərini cəlb edə biliblər.

Sonra layihədə iştirak etmiş region startapçıları çoxistiqamətli texnoloji həlləri ilə bağlı təqdimatlarla çıxış ediblər. Layihələr xidmət sektorunu (məşğulluq, yemək çatdırılması, avtomobil icarəsi və s.), elektron ticarət, aqrobiznes həlləri və təhsil texnologiyası kimi sahələri əhatə edir.

Təlimlər silsiləsindən ibarət proqram Şəki, Zaqatala, Mingəçevir, Gəncə, Sumqayıt və Lənkəranda həyata keçirilib. “INNOSTART”ın mentorluq istiqaməti isə regionlarda innovasiya yönümlü layihələr üçün 18 yeni mentor yetişdirib.

Qeyd edək ki, “INNOSTART” layihəsinin əsas məqsədi ölkəmizin bölgələrində startap quruculuğu üzrə maariflənməni gücləndirməkdir. Təlimlərdə startap komandaları ideyanın biznesə çevrilməsi və inkişaf etdirilməsi, innovativ fəaliyyətin ölkə iqtisadiyyatına verdiyi faydalar haqqında aktual biliklər əldə ediblər. Bununla yanaşı, təlimlərin iştirakçıları startap quruculuğunun müxtəlif aspektlərini və ən qabaqcıl beynəlxalq təcrübəni özündə birləşdirən praktiki tapşırıqları yerinə yetirməklə mühüm bacarıqlara yiyələniblər.