RƏQƏMSAL DÜNYA

Rəqəmsal İnkişaf və Nəqliyyat Nazirliyinin tabeliyində olan İnnovasiya və Rəqəmsal İnkişaf Agentliyi yerli ekosistemin tanınmış oyunçularından olan “SUP.VC” Akselerasiya Mərkəzi ilə əməkdaşlıq haqqında razılığa gəlib.

Xeberler.az Rəqəmsal İnkişaf və Nəqliyyat Nazirliyinin yaydığı məlumata istinadən xəbər verir ki, regionlarda yaşayan təşəbbüskar gənclərin potensiallarını qiymətləndirmək, onların sahibkarlıq təfəkkürünü daha da inkişaf etdirmək baxımından ölkənin 5 regionunda maarifləndirmə və mentorluq tədbirləri təşkil olunacaq. Layihəyə əsasən Gəncə, Lənkəran, Şəki, Zaqatala və Mingəçevir şəhərlərində 500-dən çox gənc üçün təqdimat görüşləri təşkil olunacaq, ekosistemin tanınmış üzvlərinin iştirakı ilə panel müzakirələri, innovativ sahibkarlığa dair seminarlar keçiriləcək.

Proqram gənclər, tələbələr, vaxtilə startap qurmuş ekosistemin sabit üzvləri və təlimçilər üçün nəzərdə tutulub.

İnnovasiya və Rəqəmsal İnkişaf Agentliyinin İnnovasiya ekosisteminin quruculuğu departamentinin rəhbəri Leyla Hacıyeva sözügedən əməkdaşlıqla bağlı bildirib: “SUP. VC” ilə birgə əməkdaşlığa çox şadıq. Çünki bu, startap ekosisteminin oyunçularının ümumi potensialının gücləndirilməsinə dəstək vermək öhdəliyimizlə üst-üstə düşür. Geniş miqyasda baxsaq, hər bir gənc rəqəmsal savadlılıq, sahibkarlıq haqqında təcrübəyə əsaslanan biliklərə sahib olarsa, öz ideyasının biznesə dönüşməsinin planlamasını daha düzgün və uğurlu qura bilər. Dövlət-özəl sektor tərəfdaşlığına daha bir nümunə olaraq biz, “SUP.VC” ilə birgə öz təcrübəmizdən, şəbəkəmizdən və resurslarımızdan istifadə etməklə layihənin uğurla həyata keçirilməsi üçün səylərimizi birləşdirəcəyik”.

“SUP.VC”-nin direktoru Rəşad Eyvazov bildirib: “Layihə çərçivəsində yüzlərlə gənc öz innovativ ideyalarını necə biznesə çevirməyi, həmçinin startap qurmağı öyrənəcək. Bu fürsət region gəncləri üçün bir ilkdir və sevinirik ki, regional startap mərkəzlərinin qurulmasına nail olduq. Biz bu mərkəzlərdə peşəkar təlimçilərin yetişdirilməsini də qarşımıza hədəf qoymuşuq. Təlimçilər yeni iştirakçılara mentorluq proqramları keçərək onlara startap icmasının üzvü olmağa dəstək göstərəcəklər. Ən iddialı və istedadlı gənclər, təbii ki, gələcəkdə pre-inkubasiya və tam inkubasiya proqramlarında iştirak etməklə irəliyə doğru vacib addımlar atacaqlar’’.

Qeyd edək ki, layihə çərçivəsində cari ilin sonunda bölgələrdən olan gənclər üçün Gəncə şəhərində “İdeaton” adlı tədbir təşkil olunacaq. Tədbirin qalibləri “SUP.VC”-nin inkubasiya və akselerasiya mərkəzlərində səriştəlilik proqramlarında iştirak hüququ qazanacaqlar.