AZNET

"Dövlət Gömrük Komitəsi bir xeyli jurnalistlərə bir həftə müddətində gömrük sisteminnin modernləşməsi ilə bağlı təlimlər təşkil etdi. Bundan sonra gözləntilər o olmalıydı ki, mediada gömrük sistemində şəffaflıq, problemlər və onların aradan qaldırılması yolları haqqında yazılar çoxalacaq. Hansı ki, Dövlət Gömrük Komitəsi  islahatlar apardığını elan edib və güman ki təlimdəki jurnalistlərə də bu məsələni diqqətdə saxlamağı xahiş edib. Bir - iki gün öncə mən bir gömrük məntəqəsindəki mövcud vəziyyətlə bağlı ictimai əhəmiytət kəsb edəcək məqamları özündə əks etdirən status paylaşdım.  Əslində bir neçə ay öncə də oradan bu formada bir açıqlama yazmışdım. İndiki halda bu məsələni qabartmağımda gözləntim DGK-dan yox, daha çox mediadan idi. Çünki, cəmi bir neçə gün öncə təlimdə xeyli bilgi əldə edən jurnalistlər üçün bunun göydəndüşmə olacağını, faydalı bir mənbə olacağını, geniş açıqlamalar və araşdırmalar olacağını düşünürdüm. Amma , qəribədir ki, xəbər saytlarının böyük əksəriyyəti həmin gömrük məntəqəsindəki vəziyytlə bağlı tutarlı faktlara əsaslanan yazıya diqqət yetirmədi. Əvəzində isə bu statusun sosial mediada paylaşımları oldu."

Bu sozləri  Xeberler.az-a açıqlamasında Azərbaycan İnternet Forumunun prezidenti Osman Gündüz söyləyib. Xeberler.az ekspertin şəxsi sosial hesabında paylaşdığı həmin statusu təqdim edir: 

Ekspert eyni zamanda problemin yazılanların aktuallığı və ya ictimai əhəmiyyət kəsb etməməsi ilə bağlı olmadığını vurğulayıb:

"Bəlkə, DGK-nın təliminidə yetərli biliklər əldə edə bilməyiblər ? Yoxsa problem daha dərindirmi ? Bəlkə, ümumiyyətlə KİV siyasətini müəyyən edənlər, Mətbuat Şurası dövlət qurumlarının media ilə bu tip addımlarını məhdudlaşdıran qadağalar müəyyən etməlidirlər. Bütün dövlət qurumları o dərəcədə səmimidirmi ki özünün fəaliyyətinə ictimai nəzarəti gerçəkləşdirməli olan jurnalistə zəruri olan bilgilərin hamısını versin ? Bunu müstəqil ekspertlərin, digər ixtisaslamış özəl qurumların etməsi daha faydalı olmazmı ? Mətbuat Şurasının, media qurumlarının özlərinin bu tip təlimlər təşkil etməsi daha doğru olmazdımı ?Digər tərəfdən də, görəsən müstəqil qurumların, vətəndaş cəmiyyətinin indiki anda belə resursları, imkanları varmı ki jurnalsitlərin peşəkarlığının artırılmasına dəstək versin. Görünən odur ki nəhəg resurslara , geniş imkanlara malik olan bəzi dövlət qurumları rəqabət imkanları məhdud olan media və vətəndaş cəmiyyətinə təsir imkanlarını saxlamaqda çox maraqlıdırlar."

Osman Gündüz son olaraq fikirlərini belə yekunlaşdırıb:

"Dövlət qurumlarının və dövlət məmurlarının resursları, yeni bilgilər almaq imkanları, dünyanın istənilən yerində təlimlərdə iştirak imkanları yetərincə güclüdür və güclənməkdə davam edir. Onlar üzərində ictimai nəzarəti gerçəkləşdirməli olan Vətəndaş cəmiyyəti və medianın belə imkanları zəidir. Reallıq budur ki bir tərəfdə zəifləməkdə olan media və vətəndaş cəmiyyəti, digər tərəfdə isə güclənməkdə olan dövlət qurumları. Zəif media və zəif vətəndaş cəmiyyəti isə bütöbvlükdə cəmiyyətin inkişafını əngəlləyən faktorlardır.  Düşünürəm ki, KİV siyasətinə cavabdeh olanlar, vətəndaş cəmiyyətinin və medianın inkişafını dəstəkləyən müvafiq dövlət qurumaları bunun fərqində olmalıdırlar."