TƏDBİRLƏR

Bu gün Xeberler.az İKT Portalının baş redaktoru, Azərbaycan İnternet Forumunun prezidenti, Multimedia Mərkəzinin direktoru və BDU-nun müəllimi Osman Gündüzün ad günüdür.

Osman müəllimin 55 yaşı tamamlanır.

O, uzun illərdir ki, ölkədə informasiya texnologiyalarının və İnternetin, elektron hökumət quruculuğunun inkişafı istiqamətində yorulmadan çalışır.

Osman Gündüz ölkədə vətəndaş cəmiyyətinin formalaşması və inkişafında ciddi səylər göstərib. İKT sahəsində ilk ictimai qurum təsis edib. Rəhbərlik etdiyi Multimedia Mərkəzi ölkədə İKT sahəsinin inkişafında və bu sahənin populyarlaşmasında mühüm rol oynayıb.

Bu qurum tərəfindən ölkədə ilk milli multimedia məhsulu və elektron tədris resursları hazırlanıb, ölkədə ilk olaraq bloqçuluq hərəkatına start verilib, dövlət qurumlarının onlayn şəffaflıq vəziyyəti ilə bağlı hesabatlar hazırlanır.

ABŞ-ın Oklahoma Universitetində Yeni media sahəsi üzrə təhsil aldıqdan sonra ali təhsil müəssisələri üçün Yeni Medianın tədris proqramlarını hazırlayıb və universitetlərdə bu fənlərin tədrisinidə yaxından iştirak edir.

Onun rəhbərlik etdiyi Azərbaycan İnternet Forumu Azərbaycan İnternetinin bir infrastruktur olaraq formalaşmasında, milli internet resurslarının və internet biznesin - startap hərəkatının inkişafında mühüm rol oynayır.

Osman Gündüz İnternet və İT sahəsi, Yeni media ilə əlaqəli bir sıra kitabların müəllifi və həmmüəllifi olub, İT və İnternet sahəsində xeyli sayda uğurlu layihələrə rəhbərlik edib

O, Milli Məclisdə İT və İnternet , İnformasiya azadlığı ilə bağlı qanun layihələrinin hazırlanması üzrə işçi qruplarda aktiv iştirak edib. RYTN yanında İT-nin Inkişafı Dövlət Fondunun Müşahidə Şurasının üzvü olaraq, Vətəndaşlara Xidmət və Sosial İnnovasiyalar üzrə Dövlət Agentliyi yanında İctimai Şuranın kordinatoru olaraq, həmçinin də təhsil sisteminin informasiyalaşdırılması ilə bağlı qurumlarda çalışaraq ölkədə informasiya cəmiyyətinin formalaşması istiqamətində yaxından iştirak edir.

Baş redaktorumuzu ad günü münasibətilə ürəkdən təbrik edir, ona möhkəm cansağlığı, şəxsi həyatda, ictimai və pedaqoji fəaliyyətində uğurlar arzulayırıq!

 Xeberler.az kollektivi