«Biz hökumətdən cavab və ciddi reaksiya gözləyirik»

19-01-2012 / 12:18
«Cəmiyyət bilməlidir ki, bu hücum nə üçün baş verib»

“Kiberhücum göstərdi ki, Azərbaycanda rəsmi dövlət qurumlarının internet resurslarının dayanıqlığı yetərli deyilmiş”. Bunu, Azərbaycan Internet Forumunun prezidenti Osman Gündüz deyir.
Onun sözlərinə görə, ötən illər ərzində müəyyən işlər görülsə də, məlum hadisə bu işlərin az olduğunu göstərdi: “2005-ci ilə qədər dövlət orqanlarının internet resurslarının hərəsi dünyanın bir yerində idi. Amma 2005-ci ildən bu yana bu resursların hamısını Azərbaycana gətirdilər, ayrı server yaratdılar, Xüsusi Dövlət Mühafizə Xidmətinin bir qurumunu buna ayırdılar. Yəni son dövrlər bu istiqamətdə işlər görülüb. Amma baş verənlər görülən işlərin yetərli olmadığını göstərdi. Sən demə, böyük təhlükə var imiş, hakerlər bir anda Azərbaycana məxsus 40-a yaxın milli informasiya resursunu darmadağın edə bilərlərmiş. Amma məsul şəxslər bunu heç nəzərə də almayıblar”.

O.Gündüz hesab edir ki, Rabitə və Informasiya Texnologiyaları Nazirliyi, Xüsusi Dövlət Mühafizə Xidməti və Milli Təhlükəsizlik Nazirliyi məsələni ciddi araşdırmalı və nəticə çıxarmalıdır: “Cəmiyyət bilməlidir ki, bu hücum nə üçün baş verib? Əsas səbəblər nə ola bilər? Bu, kadrların səhlənkarlığı və ya qeyri-peşəkarlığıdırmı? Bu, texnoloji qüsurdurmu? Ola bilər ki, daha keyfiyyətli və bahalı proqramlar əvəzinə ucuz və ya pulsuz proqramlardan istifadə olunub. O da ola bilər ki, təhlükəsizlik məsələlərinə qəpik-quruş ayrılıb. Bunların hamısı araşdırılmalıdır. Cəmiyyətin bu izahlara ciddi ehtiyacı var.

Bu məsələyə belə yanaşılmalıdır ki, sanki Azərbaycanın Xəzərdə üzən 30 gəmisini partlatdılar, göydə təyyarələrimizi vurdular, nazirliklərin ofislərini yandırdılar. Biz hökumətdən cavab və ciddi reaksiya gözləyirik. Diaqnozun qoyulması müalicənin 50 faizi deməkdir. Hökumət bu məsələyə ciddi diqqət yetirməlidir. Bu məsələdə təhlükəsizlik sahəsində peşəkar kadrların hazırlanması ən vacib və ən çox diqqət edilməli olan məqamdır”.

Xatırladaq ki, yanvarın 16-da Azərbaycanın dövlət orqanlarının, hakim siyasi partiyasının və bəzi KIV-nin saytlarına kütləvi kiberhücum olub. Dağıdılan veb-səhifələr sırasında prezident Ilham Əliyevin, Yeni Azərbaycan Partiyasının, Daxili Işlər Nazirliyinin, Dövlət Gömrük Komitəsinin, Təhsil Nazirliyinin, Konstitusiya Məhkəməsinin, Rabitə və Informasiya Texnologiyaları Nazirliyinin, Xüsusi Dövlət Mühafizə Xidmətinin, həmçinin rəsmi dövlət agentliyi olan AzərTac-ın da saytı var idi. (www.azadliq.info)

ŞƏRHLƏR


OXŞAR XƏBƏRLƏR







sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.