PROQRAMLAR

«Symantec» şirkəti bir vaxtlar kompüterin işinin optimallaşması üçün məşhur toplu olan «Norton Utilities»in bərpası haqqında məlumat yayıb. «Norton Utilities»in son versiyası 2002-ci ildə buraxılıb və həmin vaxtdan onun komponentləri «SystemWorks» adlı daha yüksək qiymətli məhsula birləşdirilib.

«APA-ECONOMICS»in məlumatına görə, toplu əməliyyat yaddaşında boş yerin artırılması, kompüterin yüklənməsinin sürətləndirilməsi, sərt diskdə yerin boşaldılması və ümumiyyətlə sistemin məhsuldarlığının artırılması üçün nəzərdə tutulub. «Norton Utilities»in yeni versiyası «Windows XP» və ya «Vista» əməliyyat sistemli kompüterlərdə istifadə oluna bilər.

Xatırladaq ki, «Norton Utilities»in ilk versiyası 1981-ci ildə amerikalı proqramçı Peter Norton tərəfindən buraxılıb. Nortonun təsis etdiyi proqram təminatının hazırlanması üzrə şirkət 1990-cı ildə «Symantec» tərəfindən alınıb. «Norton Utilities» 2003-cu ildən ayrıca məhsul kimi artıq mövcud deyil, onun komponentləri «Norton SystemWorks»da birləşdiriləcək. Bu paketə optimallaşma vasitələri ilə yanaşı viruslardan qorunma və şpion proqramları daxildir. «SystemWorks»a bir kompüter üçün illik abunənin qiyməti 70 dollardır.