Xeberler.az məlumat verir ki, qlobal çağırışlar fonunda təşkil olunan genişmiqyaslı “Openwave” hakatonunun rəsmi təşkilatçıları İnnovasiya və Rəqəmsal İnkişaf Agentliyi, Nərimanov Rayon İcra Hakimiyyəti və Tedspace şirkətidir.
“Openwave” Açıq İnnovasiya Proqramının əsas məqsədi dövlət idarəçiliyində ənənəvi qapalı yanaşmalardan imtina edərək startapların, texnoloji cəmiyyətin və fərdi istedadların potensialından birgə faydalanmaqdır. “Açıq innovasiya” modeli vasitəsilə dövlət qurumlarının kənardan gələn innovativ ideya və texnoloji həlləri daxili proseslərinə inteqrasiya etməsi hədəflənir.
48 saat davam edəcək hakatonda ekspertlər, proqramçılar, dizaynerlər və tərtibatçılardan ibarət komandalar iştirak edəcək. Seçim mərhələsindən sonra 15-20 peşəkar komandanın, ümumilikdə isə 60-90 iştirakçının yarışacağı bildirilib.
Təqdimatların yekununda ilk 3 komanda müəyyən ediləcək və qaliblərə ümumi 10 min manat məbləğində mükafat fondu təqdim olunacaq. Birinci yerin qalibi 5000 manat, ikinci yerin qalibi 3000 manat, üçüncü yerin qalibi isə 2000 manat qazanacaq.
Qeyd olunub ki, hakaton yalnız yarış platforması deyil, eyni zamanda Nərimanov rayonu üzrə idarəetmənin optimallaşdırılması üçün praktik mexanizm kimi nəzərdə tutulub. Layihənin əsas məqsədi ərazi problemlərinin müəyyən edilməsi, qeydiyyatı, prioritetləşdirilməsi və həll prosesinin monitorinqi üçün rəqəmsal həllərin hazırlanmasıdır.
İştirakçılar tərəfindən hazırlanacaq həllərdə sistematik nəzarət, problemlərin operativ qeydiyyatı və yönləndirilməsi, foto və geolokasiya əsaslı mobil idarəetmə, analitik panellər, rəqəmsal arxiv və audit sistemi, icra və status izləmə mexanizmləri, avtomatlaşdırılmış xəbərdarlıqlar və kommunal xidmətlərin vahid koordinasiyası kimi funksionallıqların yer alması tələb olunur.
Qeydiyyat üçün linkə daxil ola bilərsiniz.
