MOBİL RABİTƏ

Hazırda 4G istifadəçilərinin sayı 3G istifadəçilərinin sayından əhəmiyyətli dərəcədə az olduğu üçün abunəçilər tərəfindən istifadə olunan ümumi trafik həcminə ciddi bir təsir müşahidə olunmur.

Cari ilin may ayında Bakcell şirkəti IV Sür@ brendinin 4G LTE xidmətini kommersiya istifadəsinə verib.

Bu barədə Xeberler.az-a Bakcell şirkətindən məlumat verilib.

Şirkətdən qeyd edilib ki, adıçəkilən xidmətə qoşulduqdan sonra abunəçilərin istifadəsində iki əsas dəyişiklik müşahidə edilib:

4G istifadəçiləri orta hesabla iki dəfə çox mobil internet istifadə edib;

4G istifadəsindən sonra müştəri məmnuniyyəti əhəmiyyətli dərəcədə artıb.

Şirkətin məlumatına görə, ümumilikdə 4G LTE texnologiyası mobil internetdən yüksək səviyyədə istifadəni təmin edir. Bunu xüsusilə Bakı ərazisində müşahidə edən abunəçilər Bakcell şirkətinin təqdim etdiyi 4G xidmətindən 150 Mbit/s çatan sürətlə faydalanırlar. Bu isə adi internetdən dəfələrlə çoxdur.

Şirkətdən Xeberler.az-a onu da bildiriblər ki, şəbəkədə ləngimənin minimum həddə olması sayəsində Bakcell abunəçiləri iri həcmli faylları, tez bir zamanda yükləyib göndərir, onlayn videolar və filmləri yükləmə olmadan izləyir, onlayn oyunlar oynayır, müxtəlif saytlar və sosial mediadan mükəmməl rahatlıqla istifadə edə bilirlər.

Azərbaycanda 4G xidmətlərinə olan tələbat və 4G texnologiyasını dəstəkləyən cihazların sayı getdikcə artmaqdadır.

Bakcell-dən Xeberler.az-a onu da bildiriblər ki, şirkət yaxın gələcəkdə 4G istifadəçilərinin sayının artması ilə əlaqədar trafik həcmin çoxalmasına olan tələbatı qarşılamağa tam hazırdır.

Ruhəngiz Muradova