PROQRAMLAR

Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidmətinin təşkilatçılığı ilə 28-29 oktyabr tarixlərində Asiyada Qarşılıqlı Fəaliyyət və Etimad Tədbirləri üzrə Müşavirəyə (AQEM) üzv dövlətlərin nümayəndələrinin iştirakı ilə fərdi məlumatların mühafizəsi sahəsində əməkdaşlığın gücləndirilməsi üzrə onlayn formatda beynəlxalq forum keçirilib.

Xeberler.az bildirir ki, forumda fərdi məlumatların mühafizəsi sahəsində tendensiyalar, süni intellekt və innovasiyalar fonunda məlumatların mühafizəsi ilə inkişaf arasında balansın təmin olunması barədə danışılıb. Həmçinin məlumatların mühafizəsinə nəzarət edən qurumların qarşılaşdıqları çətinliklər, transsərhəd məlumat ötürülməsinin təhlükəsizliyi və qlobal şirkətlər üçün hesabatlılıq mexanizmlərinin formalaşdırılması, fiziki şəxslərin hüquqlarının qorunması və rəqəmsal etimadın gücləndirilməsi, eləcə də təlim və maarifləndirmə təşəbbüslərinin genişləndirilməsi ilə bağlı ətraflı fikir mübadiləsi aparılıb. 15-dən çox üzv dövlətin nümayəndələri ölkələrində fərdi məlumatların mühafizəsi üzrə görülən işlər və bu sahədə təcrübələrini bölüşüblər.

Elektron Təhlükəsizlik Xidmətinin Fərdi məlumatların mühafizəsi sektorunun müdiri Xəyalə Babayeva çıxışında forumun regionda rəqəmsal təhlükəsizlik və fərdi məlumatların mühafizəsi üzrə əməkdaşlığın gücləndirilməsinə xidmət edən mühüm dialoq platforması olduğunu bildirib. O, həmçinin fərdi məlumatların mühafizəsi istiqamətində Azərbaycanda həyata keçirilən işlər barədə ətraflı məlumat verib.

Tədbirin yekununda iştirakçılar AQEM məkanında fərdi məlumatların mühafizəsi sahəsində ortaq baxışın formalaşdırılması, qarşılıqlı etimad və təcrübə mübadiləsinin gücləndirilməsi, əməkdaşlığın genişləndirilməsi, genişmiqyaslı təlim və maarifləndirmə fəaliyyətlərinin təşviqi, eləcə də birgə təşəbbüslərin həyata keçirilməsi ilə bağlı təkliflərini səsləndiriblər.