“Asan İmza” Daşkənddə təqdim edilib

22-09-2016 / 12:43

Cari ilin 19-23 sentyabr tarixlərində Özbəkistanın paytaxtı Daşkənd şəhərində “ICTWEEK Uzbekistan 2016” informasiya-kommunikasiya texnologiyaları həftəsi keçirilib.

Xeberler.az-ın məlumatıan görə, Özbək İKT həftəsi çərçivəsində baş tutan çoxsaylı tədbirlərdən biri olan İnternet Forumda B.EST Solutions şirkəti Azərbaycanın “Asan İmza” mobil elektron imza texnologiyasını təqdim edib. Tədbirdə mobil identitet mövzusunda təqdimatla çıxış edən şirkətin rəhbəri Yana Krimpe mobil imza texnologiyasının imkanları və üstünlükləri barədə bəhs edib, eləcə də tədbir iştirakçılarını mobil identitet alətinin tətbiqi ilə elektron xidmətlərin və innovativ həllərin inkişafı sahəsindəki cari vəziyyətlə tanış edib.

O qeyd edib ki, mobil identitet təqdim etdiyi xidmətlərin keyfiyyətini yüksəltmək istəyən və istifadəçiləri ilə qarşılıqlı əlaqələri təkmilləşdirməyə can atan dövlət və özəl müəssisələrin elektron məlumat sistemlərinə giriş imkanı verən ən çevik və effektiv alətdir. Vurğulanıb ki, innovativ cəhətlərinə və istifadədə rahatlığına görə, hazırda Azərbaycanda “Asan İmza” vasitəsilə təqdim edilən elektron xidmətlərin sayı yüzlərlə ölçülür və bu xidmətlərə daxil olmaq üçün sadəcə mobil telefonun və bütün mobil operatorlar üçün eyni olan Asan İmza SIM-kartının mövcudluğu kifayət edir.

“Asan İmza” ilə mümkün olan e-xidmətlər sırasında elektron vergi və gömrük bəyan etmə xidmətləri, hüquqi şəxslərin onlayn qeydiyyatı, korporativ bank hesabının onlayn açılması, işəgötürənlə işçi arasında bağlanılan əmək müqaviləsinin onlayn qeydiyyatı, ali məktəblərə daxil olmanın onlayn qeydiyyatı, mobil imza texnologiyasının telefon çağrı mərkəzləri ilə inteqrasiyası, internet və mobil bankçılıq və s. kimi  xidmətlər tədbir iştirakçılarının xüsusi marağına səbəb olub.

Tədbir çərçivəsində Özbəkistanda Azərbaycanın “Asan İmza” modeli əsasında mobil identitet və imza texnologiyasının tətbiqi sahəsində mümkün əməkdaşlıq məsələlərinin müzakirə edildiyi ikitərəfli görüşlər də keçirilib.

Builki  ”ICTWEEK Uzbekistan” həftəsi Rusiya, Böyük Britaniya, ABŞ, Koreya, Belçika, Qazaxıstan, Azərbaycan, İsrail, Çin, İsveçrə və digər ölkələri təmsil edən sahibkarları, rəhbər şəxsləri və mütəxəssisləri bir araya gətirib. Ümumilikdə, tədbirin işinə sıralarında dövlət orqanlarının və İKT sahəsində fəaliyyət göstərən müəssisələrin rəhbərləri, beynəlxalq ekspert və analitiklər, iri texnoloji şirkətlərin təmsilçiləri və digər vəzifəli şəxslərin olduğu 400-dən artıq iştirakçı qatılıb.

Qeyd etmək lazımdır ki, cəlbedici ixrac potensialına malik olan “Asan İmza” texnologiyası mütəmadi olaraq bu kimi müxtəlif beynəlxalq sahəvi tədbirlərdə “Made in Azerbaijan” şüarı altında təmsil edilir. B.EST Solutions şirkəti qabaqcıl mobil identitet və imza texnologiyasının tətbiqi və istifadəsi, eləcə də mobil imza xidmətinin dövlət və özəl elektron sistemlərlə qarşılıqlı əlaqəsi sahəsində Azərbaycanın əldə etdiyi nailiyyətlərin təqdim edilməsi məqsədilə beynəlxalq tədbirlərdə fəal iştirak edir. 

“Asan İmza” Azərbaycanda vahid elektron hökumət konsepsiyasının mühüm komponentini təşkil etməklə yanaşı, özəl sektorun elektron xidmətlərinin göstərilməsində də istifadə olunur. Hazırda ölkədə bir çox banklar, sığorta şirkətləri, onlayn ödəniş portalları öz elektron sistemlərində mobil imza xidmətindən fəal şəkildə yararlanır.

 

Məltəm Talıbzadə

 


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.