ATƏT İnternetin istənilən nəzarətinin əleyhinədir
25-11-2008
16:59
ATƏT hesab edir ki, İnternetdə plüralizm və informasiyanın sərbəst axını təmin olunmalıdır. Bu barədə bazar ertəsi İnternetin inkişafına dair Belarus paytaxtı Minskdə keçirilmiş konfransda ATƏT-in KİV azadlığı üzrə direktoru Roland Bless bəyan edib.
“Bizim müraciətimiz açıq-aydındır – İnterneti tənzimləməyin”, deyə R.Bless bəyan edib. Bununla yanaşı o qeyd edib ki, İnternetin tənzimlənməsinə dair danışıqlar əsasən “KİV haqqında” qanun kontekstində aparılır. Direktorun sözlərinə görə, “KİV İnternetin kiçik bir hissəsidir, İnternetin əsas hissini KİV təşkil etmir. Burada kommersiya tutumlu informasiya, elektron kitabxana, bilet sifarişləri, elektron mağazalarda alış-veriş mövcuddur”.
R.Blessin fikrincə, İnterneti tənzimləmə cəhdləri iqtisadi problemlərə gətirib çıxara bilər. Qlobal Şəbəkənin kriminal xarakterli məzmununa gəldikdə isə, ATƏT rəsmisi əmindir ki, belə vəziyyətdə hüquq pozuntulu hərəkətlərlə mübarizəyə qarşı əlavə qanunlara ehtiyac yoxdur, İnterfaks yazır.
