AZNET

Azərbaycan Beynəlxalq telekommunikasiya İttifaqının (BTİ) 2013-cü ilin nəticələrinə əsasən genişzolaqlı internetin inkişafını əks etdirən hesabatında mövqelərini yüksəldib.

17 balla 48-ci yerdə qərarlaşan Azərbaycan MDB məkanında stasionar genişzolaqlı internetin əhatə dairəsinə görə Rusiyanı (50-ci yer), Moldovanı (60-cı yer), Qazaxıstanı (68-ci yer), Türkiyəni (69-cu yer), Gürcüstanı (72-ci yer), Ukraynanı (78-ci yer), Ermənistanı (80-ci yer), İranı (92-ci yer) geridə qoyub.

Bundan başqa, mobil genişzolaqlı şəbəkə istifadəçilərinin sayına görə Azərbaycan 43.9 balla 46-cı yerdə qərarlaşıb. Beləliklə, Azərbaycan Qazaxıstan, Litva, Moldova, Belarus, Ermənistan, Gürcüstan və digər MDB ölkələrini, eləcə də, qonşu Türkiyəni geridə qoyub.

İnkişaf edən ölkələrdə internetlə təmin edilmiş ev təsərrüfatlarının sayına görə Azərbaycan beynəlxalq reytinqdə 51.5 balla 23-cü yerdə qərarlaşıb. Bu reytinqdə Azərbaycan qonşu Türkiyəni, İranı, Gürcüstanı, Ermənistanı xeyli geridə qoyub.

İnternetdən istifadə edən insanların sayına görə ölkələrin reytinqinə əsasən, Azərbaycan 58.7 balla 63-cü yerdə qərarlaşıb və bununla da Qazaxıstanı, Türkiyəni, Ukraynanı və Ermənistanı qabaqlayıb.

İnkişaf etmiş ölkələrdə internetdən istifadə edən insanların sayına görə beynəlxalq reytinqdə Azərbaycan 58.7 balla 24-cü yeri, MDB məkanında isə birinci yeri tutub.

Reytinqlər BTİ ilə UNESCO-nun rəqəmli inkişafın təşviqi məqsədi ilə yaratdıqları “Genişzolaqlı Rabitə Komissiyası”-nın keçirdiyi araşdırmalar əsasında hazırlanıb.