EDUTECH

Avqustun 11–21-də Hindistanın Mumbay şəhərində keçirilən XVIII Beynəlxalq Astronomiya və Astrofizika Olimpiadasında (IOAA 2025) Azərbaycan məktəbliləri ölkəmizi uğurla təmsil ediblər.

Xeberler.az bildirir ki, BDU-da V Azərbaycan Astronomiya Olimpiadasının qalibləri arasında keçirilmiş seçmə imtahan əsasında müəyyən edilən 5 nəfərlik Azərbaycan komandası olimpiadada iştirak edib. Komandanın nəzəri və praktiki hazırlığı BDU-nun müəllimləri tərəfindən olimpiadaya qədər davam etdirilib və şagirdlər bu hazırlıq prosesində yüksək səviyyədə bilik və bacarıq qazanıblar.

Olimpiada nəzəri və praktiki turlardan ibarət olub. Azərbaycan məktəbliləri 2 bürünc və 2 həvəsləndirici mükafat qazanıblar. Oqtay Lətifli (Bakı şəhəri Fizika, Riyaziyyat və İnformatika Təmayüllü Lisey, XI sinif) və Məhəmməd Cəfərli (Bakı şəhəri Texniki Humanitar Lisey, X sinif) bürünc medal, Raiq Babazadə (Bakı şəhəri Fizika, Riyaziyyat və İnformatika Təmayüllü Lisey, X sinif) və Aqil Güləliyev (Bakı şəhəri Fizika, Riyaziyyat və İnformatika Təmayüllü Lisey, XI sinif) isə həvəsləndirici mükafat əldə ediblər.

Azərbaycan məktəbliləri artıq 5 ildir ki, bu mötəbər yarışda iştirak edir, bu müddət ərzində 11 dəfə fəxri ada və mükafata layiq görülüblər.

Beynəlxalq Astronomiya və Astrofizika Olimpiadası hər il ənənəvi olaraq təşkil olunur və nəzəriyyə, məlumatların təhlili, teleskoplardan istifadə və digər praktiki mərhələlərdən ibarət olmaqla, dünyanın nüfuzlu elmi olimpiadaları sırasında yer alır.

BDU, Təhsil İnstitutu və Tusi-Bohm Planetariumunun dəstəyi ilə həyata keçirilən bu layihələr gələcək alimlərin formalaşmasına və ölkəmizin elmi-intellektual inkişafına mühüm töhfə verir.