TƏDBİRLƏR

Cenevrə şəhərində 2-27 noyabr tarixlərində Ümumdünya Radiorabitə Konfransı  keçiriləcək.

32 bənddən ibarət olan gündəlik üzrə bu il Rabitə və Yüksək Texnologiyalar Nazirliyi (RYTN) tərəfindən 7 təklif hazırlanıb.

Bu barədə Xeberler.az-a Nazirlikdən məlumat verilib.

Məlumatda qeyd edilib ki, bu təkliflərdən üçü  RRB ilə, biri CEPT-lə birgə, üçü isə tək Azərbaycan adından verilib.

Qeyd edək ki, Ümumdünya Radiorabitə Konfransı (ÜRK) Beynəlxalq Telekommunikasiya İttifaqı tərəfindən hər 4 ildən bir keçirilir və sonuncu belə konfrans 2012-ci ildə Cenevrə şəhərində  keçirilib.

Tədbir çərçivəsində ənənəvi olaraq radiotezliklərin beynəlxalq səviyyədə ayrılması, yeni radiotexnologiyaların tətbiqi və onlara  tezliklərin ayrılması, müxtəlif radiotexnologiyaların qarşılıqlı maneəsiz istismarının texniki xüsusiyyətləri (məsələn, rəqəmli TV və mobil rabitə), sərhəd ərazisində qonşu ölkələr arasında tezlik siqnallarının razılaşdırılmasının texniki şərtləri, peyk şəbəkələrinin istismarı və  qeydiyyatın prosedur qaydaları müzakirə olunacaq.
 
Konfransların  keçirilməsinin əsas məqsədi əvvəlki konfranslardan keçən dövr ərzində yeni radiotexnologiyaların tətbiqi üçün tezliklərin ayrılmasına baxılması və əldə olunmuş qərarlara əsasən Radioreqlamentə əlavə və düzəlişlərin edilməsidir.

Xeberler.az