E - HÖKUMƏT

Ankarada Azərbaycan – Türkiyə arasında həyata keçirilən e-CMR (Elektron Əmtəə-Nəqliyyat Qaiməsi) üzrə pilot layihəyə dair texniki görüş təşkil olunub.

Xeberler.az bildirir ki, tədbirdə Azərbaycanı Rəqəmsal İnkişaf və Nəqliyyat Nazirliyi, Azərbaycan Yerüstü Nəqliyyat Agentliyi, Dövlət Gömrük Komitəsi, “AzInTelecom” MMC və layihənin icrasına cəlb olunan şirkətin nümayəndələri təmsil ediblər. Türkiyə tərəfindən isə Prezident Administrasiyası, Nəqliyyat və İnfrastruktur Nazirliyi, Ticarət Nazirliyi, BTK, TOBB, TOBBUND və ITECH nümayəndələri iştirak ediblər.

Görüşdə 2008-ci il tarixli CMR Konvensiyasının Elektron Protokolu çərçivəsində beynəlxalq yükdaşımalara aid sənədlərin tam rəqəmsal formata keçirilməsi üçün tələb olunan texniki və institusional mexanizmlər müzakirə edilib. Həmçinin indiyədək görülən işlər üzrə təqdimatlar edilib, e-CMR sistemində məlumat sahələrinin UN/CEFACT standartlarına uyğunlaşdırılması, transsərhəd sənədlərdə elektron imzaların qarşılıqlı istifadəsi və onların doğrulanması mexanizmləri, sistemlər arasında texniki əlaqələndirmə və pilot test daşımalarının həyata keçirilməsi məsələləri diqqət mərkəzində olub.

Məlumat verilib ki, Azərbaycan Prezidentinin 15 dekabr 2025-ci il tarixli “İdxal-ixrac, tranzit, nəqliyyat və logistika üzrə fəaliyyətin rəqəmsallaşdırılması ilə bağlı əlavə tədbirlər haqqında” Fərmanına uyğun olaraq xarici ticarət fəaliyyəti ilə bağlı sənədlərin “Bir pəncərə” prinsipi əsasında rəqəmsal idarə edilməsi nəzərdə tutulur. Bu vahid rəqəmsallaşma ekosisteminin mühüm elementlərindən biri də e-CMR sistemi olacaq.

Görüşdə tərəflər texniki inteqrasiya işlərinin davam etdirilməsi və seçilmiş daşıyıcılar üzrə pilot e-CMR daşımalarına başlanılması qərarına gəliblər.

Qeyd edək ki, e-CMR üzrə pilot layihənin həyata keçirilməsi barədə razılıq BMT-nin Avropa üzrə İqtisadi Komissiyası (UNECE) ilə BMT-nin Ticarətin Asanlaşdırılması və Elektron Biznes üzrə Mərkəzinin (UN/CEFACT) əməkdaşlığı çərçivəsində Orta Dəhliz üzrə yaradılan İşçi qrupunun 2025-ci ildə Bakı və Cenevrə görüşlərində əldə olunub.