E - HÖKUMƏT

Cari ilin iyul ayına qədər Azərbaycanda 970 min 687 nəfər yenidoğulmuş uşağa elektron sağlamlıq kartı verilib.

Bunu Xeberler.az-a açıqlamasında Səhiyənin İnformasiyalaşdırılması Mərkəzinin direktoru Cəbrayıl Əsədzadə bildirib. 

Cəbrayıl Əsədzadənin sözlərinə görə, elektron sağlamlıq kartları poliklinikalar vasitəsilə yeni doğulmuş körpələrin valideynlərinə və pasiyentlərə təqdim edilir.

Kartlarda sahibinin şəxsiyyəti, tibbi və sosial sığorta və s. haqqında məlumat yer alır. İnformasiya tibb müəsisəsinin xidməti məlumatlarının operativ mübadiləsinə imkan verən vahid məlumat bazasında yerləşdirilir.

“Bu günədək idarənin tabeçiliyində olan bütün doğum evləri, xəstəxanaların doğum şöbələri və uşaq tibb müəssisələri bu sistemə qoşulub”, deyə Cəbrayıl Əsədzadə əlavə edib.

Qeyd edək ki, 2006-cı ildən etibarən ölkə ərzisində doğulan hər bir uşağın adına elektron sağlamlıq kartı açılır. Elektron kart Səhiyyə Nazirliyinin xüsusi şöbəsi tərəfindən verilir. Hər bir valideyn öz uşağını müayinə üçün poliklinikaya apardıqda hökmən elektron sağlamlıq kartında məlumatların yerləşdirilməsini tələb etməlidir. Kartda uşağa vurulan peyvəndlər, hər hansısa xəstəlik və ona edilən müalicə haqqında ətraflı məlumatlar yerləşdirilir. 

Mirvari Nəcəf