Azərbaycanın rabitə və informasiya texnologiyaları naziri mobil rabitə operatorlarını kəskin tənqid edib

22-01-2011 / 15:50

Azərbaycanın rabitə və informasiya texnologiyaları naziri Əli Abbasov ölkə ərazisində fəaliyyət göstərən mobil rabitə operatorlarını kəskin tənqid edib.

Xeberler.az-ın APA-ya istinadən verdiyi xəbərə görə, nazir bildirib ki, ölkədə fəaliyyət göstərən mobil operatorların qiymət sistemi şəffaf və qənaət bəxş deyil, onlar beynəlxalq və rouminq danışıqları üçün şişirdilmiş qiymətlər tətbiq edirlər: “Tariflər çox vaxt bəlkə də qəsdən mürəkkəbləşdirilmiş şəkildə olur və istehlakçılar bundan əziyyət çəkirlər”.

Ə. Abbasov deyib ki, mobil operatorların rouminq xidmətləri, ümumiyyətlə, tarif sistemi tənzimləyici orqan olaraq nazirliyi qane etmir: “Əvvəla, tarif sistemi çox qarışıqdır və şəffaf deyil. İkincisi də, bu qiymətlər şişirdilib”.

Əli Abbasovun sözlərinə görə, nazirliyin apardığı araşdırmalar göstərib ki, mobil operatorların xarici ölkələrlə danışıq qiymətləri beynəlxalq tariflərə nisbətən şişirdilib və mobil şirkətlər müxtəlif üsullardan istifadə etməklə qiymətləri hətta Tarif Şurasının qoyduğu həddən də yuxarı qaldırırlar: “Yəni onların tarifləri müxtəlif xidmətlər də əlavə olunaraq Tarif Şurasının qoyduğu qiymətlərə nisbətən süni olaraq şişirdilir. Digər tərəfdən, bundan istifadə edərək beynəlxalq rouminq tariflərini də əsassız olaraq həddən artıq qaldırıblar”.

Nazir qeyd edib ki, bu gün bir neçə ölkə - Rusiya, Ukrayna, Türkiyə, Birləşmiş Ərəb Əmirlikləri ilə danışıqlar üçün rouminq qiymətləri beynəlxalq tariflərdən dəfələrlə bahadır: “Bununla mübarizə üçün həmin ölkələrin operatorları ilə işlər aparılır. Yaxın vaxtlarda bu qiymətlər aşağı salınacaq və əhaliyə açıqlanacaq”.

Bəzi şirkətlərin indiyədək konturdan manat sisteminə keçmədiyindən narazı qalan nazir qeyd edib ki, şirkətlər hər 3 ayda bir dəfə mövcud tariflərini sadə və şəffaf şəkildə açıqlamalıdır: “Aparılan kampaniyalar zamanı təqdim olunan, eləcə də mövcud qiymətlər sadə cədvəl şəklində heç olmasa 3 aydan bir yeniləşdirilmiş şəkildə öz saytlarında, yaxud bizim nazirliyin saytında yerləşdirilməli və ya çap olunmuş vəziyyətdə əhaliyə çatdırılmalıdır. Digər tərəfdən, mobil telefon abunəçisinin imkanı olmalıdır ki, istənilən dəqiqə ya sms, ya internet vasitəsilə müraciət etməklə öz danışıqları barədə ətraflı məlumat ala bilsin. Mobil operatorlardan bəziləri bu xidməti ödənişlə təqdim edirlər. Bu düzgün deyil. Çünki şirkət verdiyi xidmət barədə istehlakçıya məlumat verməlidir və buna görə əlavə xidmət haqqı almaq olmaz”.


ŞƏRHLƏR






sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.