RƏQƏMSAL DÜNYA

WeTravel 27 milyon dollar investisiyanı almağı bacarıb. Startap bu investisiyanı fintek (“fintech”) məhsulunun inkişafına xərcləyəcək.

Xeberler.az bildirir ki, həmyerlimiz Qərib Mehdiyevin ortaqlığı ilə qurulan WeTravel startapı 27 milyon dollar investisiya alıb. 

WeTravel startapı 2014-cü ildə Yohannes Koeppel (CEO), Qərib Mehdiyev (CTO) və Zaki Prabovo (CMO) tərəfindən qurulub. Startap səyahət təşkilatçılarına vəsait toplamaq və logistikanı təşkil etmək üçün gedişdən əvvəl alətlər təklif edən onlayn ödəniş platformasıdır.

Yohannes Koeppel,  Qərib Mehdiyev və Zaki Prabovo startapa başlamaq üçün Azərbaycan, İndoneziya və İsveçrədən San Fransiskoya köçmüşdülər. Lakin burda yaşanan problemlərə görə 2019-cu ildə WeTravel-in üç təsisçisi Amsterdama köçməyə məcbur olublar. Buna baxmayaraq bu gün şirkətin biznes komandasının və müştərilərinin əksəriyyəti ABŞ-dadır.

WeTravel-in ABŞ-də, Niderlandda və Azərbaycanda işçi komandası fəaliyyət göstərir. Startapın həmtəsisçisi Qərib Mehdiyev açıqlamasında “Azərbaycanda proqramçıları işə götürmək bizə maraqlıdır" fikrini bildirib.

3000-dən çox şirkət ödənişləri qəbul etmək, rezervasiyaları səmərəli şəkildə idarə etmək və beynəlxalq valyuta köçürmələri üçün WeTravel-dan istifadə edir. Bununla da startap 500 mindən çox müştəriyə xidmət göstərir. Startapın əməliyyatların həcmi COVID-dən əvvəlki səviyyədən 300% artıb və gəlirlər hazırda 3 dəfə çoxdur. CEO və həmtəsisçi Yohannes Koeppel, bu rəqəmlərin 2023-cü ildə yenidən ikiqat artacağına inandığını bildirib.

WeTravel səkkiz il ərzində 7 milyon dollar investisiya əldə etmişdi. İndi startap Base10 Partners və Swift Ventures-in iştirakı ilə Left Lane Capital-ın rəhbərlik etdiyi B seriyasında 27 milyon dollar investisiyanı almağı bacarıb. WeTravel bu investisiyanı fintek (“fintech”) məhsulunun inkişafına xərcləyəcəyini açıqlayıb.

WeTravel-ın CEO-su Yohannes Koeppel bildirib ki, "Əhəmiyyətli olan şey ödəmə ilə bağlı deyil, daha sonra nə baş verdiyidir. Turizm şirkəti bu vəsaitlə nə etməlidir. Tipik bir səyahət istifadəçiyə 10 dollara başa gələ bilər, bunun böyük əksəriyyəti təchizatçılara gedir. Söhbət vəsaitin idarə edilməsindən gedir. Səfər nə qədər maraqlı olsa da, bir o qədər çox təchizatçı var - restoranlardan və nəqliyyat şirkətlərindən tutmuş aviaşirkətlərə, otellərə və s. qədər. Bundan əlavə, pul köçürmələri və biznesdən biznesə, ölkədən ölkəyə müxtəlif ödəniş üsulları üçün komissiyalar mövcuddur. WeTravel platforması bu prosesin iki əsas hissəsini həll edir: tədarükçüləri təşkil etmək və hər şeyi planlaşdırmaq üçün qrupu bir araya gətirənlərə kömək etmək. Sonra ödəniş prosesinin müxtəlif aspektləri ilə məşğul olmaq, istər hissə-hissə ödənişlərin qurulması, istərsə də müxtəlif valyutalar və ödəniş üsulları ilə işləmək və müxtəlif təchizatçılara onların fərdi şərtləri əsasında ödəniş etmək üçün alətlər təqdim etmək. O biznesin fintech tərəfini “səyahət üçün PayPal” kimi təsvir edir".