RƏQƏMSAL DÜNYA

Çinin Huawei, Shanghai Shendi Group, Disney China və China Unicom Shanghai şirkətləri 4.5G sahəsində Shanghai Disney Resort parkında ən yeni 4.5G şəbəkələrinin tikintisi və 4.5G texnologiyasına əsaslanan yeni xidmətlərin göstərilməsinə dair qlobal strateji tərəfdaşlıq haqqında ilk saziş imzalayıb.

Xəbərlər-in RYTN-nin rəsmi saytına istinadən verdiyi məlumata görə, sazişin məqsədi Şanxayda smart əlavələrin tanıdılması və smart city texnologiyasının tətbiqi, internetə çıxış texnologiyalarının modernləşdirilməsi və informasiya servislərinin transformiasiyasıdır.

Shanghai Disney Resort parkında 4.5G şəbəkəsini quran Huawei və China Unicom Shanghai şirkətləri Əşyaların İnterneti texnologiyalarının (IoT) və smart əlavələrin tətbiqi sayəsində Şanxayın görməli yerlərinin modernləşdirilməsinə töhfə verəcək.

İlkin mərhələdə IoT-un yüksəkkeyfiyyətli mobil şəbəkə bazası əsasında tətbiqi planlaşdırılır. Yaxın üç ildə 2К/4К standartlı videoxidmətlər, virtual reallıq xidmətləri və yüksəkkeyfiyyətli genişzolaqlı simsiz rabitə bazasında LTE-Vehicle servisi daxil olmaqla innovativ əlavələr istifadəyə veriləcək.

Bundan əvvəl Huawei və China Unicom Shanghai birlikdə 4.5G LTE-M proqramını işə salıb. Bu strateji tərəfdaşlıq sazişi 4.5G-nin qlobal miqyasda kommersiya istifadəsinin başlanmasının əsasını qoyub.

4G və 4.5G texnologiyalarının təşəkkülü yeni qurğular, xidmətlər və istifadəçilər üçün keyfiyyətli xidmətlərə əsaslanır. Növbəti beş il ərzində 4.5G/5G şəbəkələrinin sürətinin 1 Qbit/saniyəyədək artacağı, yubanmanın 10 millisaniyəyədək azalacağı, ümumi bağlantı sayının 30 milyard təşkil edəcəyi gözlənilir. Yaxın gələcəkdə 4.5G telekommunikasiya sahəsində ümumi qəbul edilmiş standart və sənayenin bütün sahələrinin əsas informasiyalaşdırma texnologiyası olacağı bildirilir.

Xeberler.az