PROQRAMLAR

Cloudflare şirkətində yaranan texniki nasazlıq genişmiqyaslı kəsintilərə yol açıb. Nəticədə ChatGPT, Claude, Spotify və X kimi milyonlarla istifadəçisi olan platformaların fəaliyyətində ciddi fasilələr yaranıb. Şirkət problemi operativ şəkildə aradan qaldıraraq, təxminən iki saat ərzində xidmətlərin tam bərpa olunduğunu bildirib.

Xeberler.az bildirir ki, Cloudflare rəsmiləri hadisənin kiberhücum nəticəsində baş vermədiyini xüsusi vurğulayıblar. Şirkətin texniki direktoru problemin kökündə sistemin daxilində uzun müddət mövcud olan, lakin indiyədək aşkarlanmayan "gizli proqram xətası"nın (latent bug) dayandığını açıqlayıb. Məlum olub ki, adi bir konfiqurasiya yeniləməsi zamanı bu xəta aktivləşərək sistemdə zəncirvari çökməyə səbəb olub. Şirkət rəhbərliyi yaranan narahatlığa görə ictimaiyyətdən rəsmi şəkildə üzr istəyib.

Mütəxəssislər bu hadisəni narahatlıq doğuran siqnal kimi qiymətləndirirlər. Amazon Web Services-də (AWS) baş verən oxşar nasazlıqdan qısa müddət sonra təkrarlanan bu hal, müasir internetin az sayda infrastruktur şirkətindən necə kritik dərəcədə asılı olduğunu göstərir. Qeyd edək ki, qlobal veb-saytların təxminən 20%-nə xidmət göstərən Cloudflare-dəki istənilən texniki nasazlıq bütün rəqəmsal ekosistemi iflic etmək gücünə malikdir.